Sawrkar ruahmanna tha tak tak mipui ten an hre lo a vei thu Governor in a sawi

Mizoram Governor Dr. Hari Babu Kambhampati chuan State chhunga mipui nawlpui ten Centrally Sponsored Scheme, Social Security Scheme leh Welfare Scheme tam zawk an hre miah lo chu a vei thu a sawi.

Nimin khan Raj Bhavan-ah K. Satish Nambudiripad, Director General, NE Zone, PIB & CBC, Ministry of I&B chuan Governor Dr. Hari Babu Kambhampati hi kawmin he hunah hian Governor chuan he thu hi a sawi a, mipui nawlpui chu sawiloh, mithiam zawk te leh khawtlang hruaitute bakah sawrkar hnathawk vengva tura ngaih te pawhin heng Scheme hrang hrang an hre fumfe lo chu pawi a tih thu a sawi a. Central Sawrkar hnuaiah Scheme tha tak tak Department hnuaia pekchhuah chi te, Welfare Schemes tha tak tak leh zankhat mitchhin tawh thulha chhungte tana sum hmuh theihna tur, inziahluh leh kumtina pawisa tlem te bak thawh ngai lo tam tak a awm thu sawin, “Hei hi mipui hian an zawm duh lova, an dawng duh lo tihna lam ni lovin an hriat lo vang a ni,” a ti a. Mipuite hriattir tur hian Bank hnathawkte leh sawrkar hnathawkte an inpek tawk erawh a ngai tih pawh sawiin, Department thenkhatah chuan an Officer ten Central Schemes atanga Department hnuai atanga beneficiary te hnena an pek theih chungchang hre lo te an la awm niin a sawi bawk.

Governor chuan heng sawrkar ruahmanna hrang hrangte mipui ten an hriat theihna tura Awareness Campaign nasa zawk pekchhuah chu tuna hmalakna pawimawh a nih thu a sawi a. Hemi kawngah hian central sawrkar Media Agency PIB leh a thawhpui DDK leh AIR te pawh tan an lak a ngaih thu leh ruahmanna tha tak siama, Awareness Campaign a theih anga tam nei turin a chah nghal a ni. He inkawmna ah hian Nampibou Marinmai, Director (News), DDK pawh a tel a ni.