Experiential Learning Centre hmasa ber hawn a ni

Mizoram-a ‘Experiential Learning Centre’ (ELC) hmasa ber chu nimin khan Champhai-a CHANEM Building-ah Champhai Bawrhsap James Lalrinchhana chuan a hawng a, ELC hi India hmarchhak-ah pawh Sikkim leh Manipur-te chiahin an la nei a ni.

Sawrkar Laipui Ministry of Information & Broadcasting hnuaia cheng nuai 100 senga din ‘Experiential Learning Centre’ (ELC) din tur hian August ni 7, 2023 atanga hmalak tan a ni a. ELC-ah hian Artificial Intelligence leh Virtual Reality hmang ‘Gaming Zone’ te, ‘HoloWorld’ leh Video fiah zawk (High Definition) hmanga thil awm dan inhrilhfiahna hmun ‘Viewing Room’ te a awm a ni. ELC din nana sum hmun cheng nuai 100 atang hian a hmunhma chei that nan leh khawl bun fel nan cheng nuai 92.39 (Rs. 92,39,797) sen tawh a ni a. Pawisa hman bang cheng nuai 7.6 (Rs. 7,60,203) pawh hi ELC tihchangtlun nana hman leh turin ruahman a ni.

ELC hawngtu leh Champhai District Bawrhsap James Lalrinchhana chuan Champhai District Bawrhsap a nih chhungin District hmasawnna atan ruahmanna tam tak siam a nih thu sawiin, Champhai District chhunga hmasawnna hrang hrang he hunah hian a tarlang a. Tuna hawn tak ELC bakah hian Champhai District Hospital-ah ICU khawl hrang hrang cheng nuai 40 man bunfel a nih tawh thu te, Hmunhmeltha leh Zote inkar kawng thawmthat a nih thu te, School pahnih ah Computer 10 ve ve bun tum a nih thu te leh Ministry of I&B te nena thawkho in Champhai District-a khua zawng zawngah naupang tan film chhuaha HIV/AIDS leh Drugs Awareness Campaign neih tum a nih thu te a sawi a. Hetih rual hian MLA leh MP Inthlanpui ten hnathawhna hun tam tak an lak hek avangin duh anga hmalak chak a ni thei lo erawh pawi a tih thu  a sawi bawk.