Zirna siamtha turin sawrkar in a theih ang tawkin hma a la dawn - Education Minister
Serchhip Teachers’ Association (STA) buatsaiha Govt. Serchhip College HD Rosanga Multipurpose Hall-a ‘Educator Enhancement Workshop’ ah hian School Education Minister Dr. Vanlalthlana chuan Mizorama zirna siamtha turin sawrkarin theihtawp a chhuah mek thu leh kum 3 chhunga hma an lak dan tur ruahmanna siam a ni tawh tih a sawi a. Zirtirtuten Quarters an neih loh avanga harsatna an tawh dan te sawrkarin a hriatpui a, Quarters 120 sakna tur an dil thu leh Chief Minister pawhin a phur pui thu a sawi a. School 50 sak that dan tur pawh ngaihtuah a nih thu leh Serchhip District chhunga School te pawh engemawzat an tel thu a sawi bawk. Education Minister chuan zirna siamtha turin sawrkar chuan an theih ang tawkin hma a la dawn tih sawiin, amaherawhchu Zirtirtuten mawhphurhna lian tak an nei dawn tih a sawi a. Zirtirtuten an tih tur an tih loh chuan sawrkar hmalakna a thlawn dawn tih hria a, theihtawpa tang turin Zirtirtute a fuih a ni. Minister hian Training and Posting Rules, 2024 duan mek a nih thu te, Zirtirtu pakhat chauh awmna School tihreh an tum dan te, Casual Teachers-ah politics a induhsakna tel lova Zirtirtu lak an nih thu te leh sawrkar hmalakna dang te a sawi a. Zirtute pawhin theihtawp chhuaha sawrkar hmalakna te thlawp turin a sawm a ni.
Zirtirtu tha ni turin inzir thar peih mi nih a pawimawh thu School Education Minister chuan sawiin, “Naupangte enkawlna kawngah Zirtirtute mawhphurhna a sang em em tih hi inhrilh nawn fo a tul a ni,” a ti a. Zirtirna kawngah chauh lo pawh zirtirtu chu a inchhiar zau tur a ni tih pawh sawiin, khaw khat parawn an nih thin avangin sawrkar Scheme hrang hrang pudarhtu a tang turin he huna Zirtirtu kalkhawm te chu a fuih a. Mipui mimir tana sawrkar laipuiin Scheme a siamte zirchiang a, zirtir chhawngtu ni turin a chah bawk a ni.
Serchhip Teachers’ Association (STA) ten kumin-a an kum 50 tlin lawmna chi khat atana an buatsaih ‘Educator Enhancement Workshop’ hi an President VL. Chanchintha-hrilmawia chuan kaihruaiin School Education Minister Dr. Vanlalthlana leh Higher & Technical Education Department-a Joint Director Dr. Lalthansangi Fanai te chu Resource Person atan hman an ni a, he hunah hian Serchhip DEO Lawmawma pawhin thu a sawi bawk a ni.
Serchhip Teachers’ Association (STA)-ah hian Serchhip khawpui chhunga Elementary atanga College thleng, Private leh sawrkara Zirtirtu zawng zawng telin tunah hian School 66 atangin Zirtirtu hi an tel mek a, September 5, 1973 khan ding tanin kumin hi an kum 50-na champha a ni. He pawl hian zirtirtute hamthatna mai bakah zirlaite hamthatna a ngaihtuah a, Serchhip khawpui chhunga zirnain hma a sawn theihna turin din a ni.
Nimin-a he hun hman ah hian STA Member mi thahnem tak telin STA Secretary John Lalvenzela chuan Report pein nikum lamah zirlaite tan ‘MLA Trophy’ inelna an buatsaih chu thla thar khian buatsaih leh tum a nih thu a sawi bawk.
Comments
Post a Comment