Serchhip DIET-ah Education Minister in Mission Lab Wave 2024 a hawng
Mission Lab Wave 2024 hi Tata Trust CSR Fund hmang tangkaia Serchhip DIET Building-a din niin Serchhip District chhungah Middle School tam takah Science Laboratory a awm loh avangin naupang in Science zirna tha zawk an neih theih nan he Laboratory hi din a ni a, hmanrua a changtlung thei ang bera lakhawm a ni. A bul tanna atan tunah hian Serchhip District chhunga Middle School 36 thlanchhuah an ni a. Heng School a Teacher te hi a tahtawla training pek an ni ang a. Lab hmanrua te pawh naupang te hman turin thawnchhuah leh hawhchhuah tir an ni dawn a. A tul dan a zirin DIET a thawktute hian Lab bungrua te nen heng School te hi an pan thin dawn bawk a ni.
School Education Minister hian he Laboratory hi tlawh hmasa in hemi hnu hian a hawnna inkhawm chu Serchhip DIET Hall-ah neih zui nghal a ni a, he hunah hian Education Minister chuan Serchhip DIET-a thawlktute hmalakna chu fakawm a tih thu sawiin, kal dan phung pangngai zawh satliah chauh duh tawk lovin ngaihtuahna thar leh tihdan phung danglam leh tha zawk laluta Zirtirtu te training an pe thin chu lawmawm a tih thu a sawi a. Zirtir kawngah a tiha tih (practical approach) a pawimawh thu sawiin, “Mihringte hian a chhiara chhiar leh ngaihthlak ngawt aiin a taka kan tih hian kan hre bel zawk,” tiin practical uar turin zirtirtute a fuih. Awmze nei zawka naupang te an zirtir theih nan ngaihthlak tam a tul thu pawh sawiin, naupang ten harsatna an neih te leh sawi duh an neih te ngaihthlak an uar lehzual a ngai tih a sawi a. Zirtirtute chu an nun vawng uluk tur te, lawmna nun neih a pawimawhzia zirtir uar tur te, a hun leh hmun a zira danglam ngam, a tul a nih phawt chuan danglam lo ngam ni tura an zirlaite buatsaih turin a fuih bawk a ni.
Mission Lab Wave 2024 hawnna inkhawm hi Serchhip DIET Lecturer John Zorammawia chuan kaihruaiin he huna thu sawitu Mizoram sawrkar-a Education Consultant Rev. Dr. K. Thanzauva chuan zirtirtu ni tura inchher mek an nih angin DIET-a training mek te chu zirtir hna an thawh tak tak hunah ram hmangaihna thinlung pu-a zirtir hna thawk turin a chah a. “Kan ram siamthatna tura pawimawh ber chu zirna tha a ni,” a ti bawk.
He hunah hian Serchhip DIET Lecturer Lalawmpuia chuan Serchhip DIET dinhmun leh Mission Lab Wave 2024 chungchang sawifiahin Principal Lalmuanpuii chuan lawmthu sawina hun a hmang a. Serchhip DIET hi April 22, 2006 khan din niin April 15, 2013-ah DIET puitlingah hlankai a ni. Pre Service Teacher Education Course hawn phalna hi National Council for Teachers Education chuan March 3, 2016 khan a pe bawk a. Tunah hian mi 101 te an training mek a ni.
Comments
Post a Comment