Zirlaibu la dawng kim lo School 1270 an la awm

Mizoram chhungah Samagra Shiksha hnuaia zirlaibu a thlawn a sem la dawngkimlo School 1270 an la awm.

RTI Act hmanga zawhna chhanna atanga a lan danin Zirlaibu la dawng kimlo te hi Primary School 581 leh Upper Primary School/Middle School 689 te an ni a. Aizawl District-ah Primary School 173 leh Middle School 136 ten Zirlaibu hi an la dawng kimlo a. Heng bakah hian Mamit District-ah School 236, Lawngtlai District-ah School 206, Lunglei District-ah School 164, Kolasib District-ah School 88, Hnahthial District-ah School 86, Champhai District-ah School 62, Saitual District-ah School 37, Khawzawl District-ah School 36, Serchhip District-ah School 33 leh Siaha District-ah school 13 ten zirlaibu a thlawna sem tur hi an la dawng kimlo a ni.

Zirlai ten Zirlaibu an la dawn kim loh chungchang ah hian Mizo Zirlai Pawl (MZP) General Hqrs. thuchhuah siamin June 3, 2024-a MZP Executive Committee Meeting chuan a hun taka zirlai ten an zirlaibu an dawn theih nan hmalak nise tia an rel thu leh thla khat a ral hnuah pawh zirlai ten an Zirlaibu an la dawng lo chu hriatthiam har an tih thu an tarlang a. Hemi bawhzui nan hian nimin khan Printing & Stationery Minister F. Rodingliana hmuin Minister chuan zirlaite harsatna hrethiam in zirlaibu chhut a nih nghal theih nan ama Department sum atanga zirlaibu chhut nghal vat a nih tur thu MZP hruaitute a hrilh tih MZP chuan sawiin, thlamuanthlak an tih thu an sawi a ni.

MZP chuan hemi chungchangah vek hian School Education Department changtu Minister chu hmuh an tum thu leh an hmuh theih loh thu an sawi a, zirlaite harsatna tawh sukiang tura engtik lai pawh a awm tura ngaih an hmu thei lo chu an ngaithiamlo hle tih an sawi bawk a ni.