Sawrkar in a sum neih ang angte Revenue thawkchhuak zawnga hmang turin a kalpui zel

Local Administration Department (LAD) changtu Minister C. Lalsawivunga chuan sawrkar in a sum neih ang ang te Revenue thawkchhuak zawnga hmang turin a kalpui zel tih a sawi.

ZPM Party in nimin-a Aizawl-a an party Office-a Chhung Inkhawm an neih ah Minister C. Lalsawivunga chuan MNF sawrkar khan leiba cheng vbc. 13,584.80 zet an hnutchhiah tih sawiin, “khatihlaia Budget pumpui kha a vaiin cheng vbc. 14209.94 niin an Budget hnuhnung bera leiba tlingkhawm kha budget pumpui atangin 95.6% zet a tling a ni,” a ti a. “He leiba phur chung hian ram rorelna kan kalpui chho ta a, puk lo thei lova min siam avangin kan puk a, puk chhunzawm zelte pawh a la ngai ang. He sawrkar hian sum kan puk a nih pawhin a hmanna tur dik takah kan hmang dawn a, dik tak zelin kan kalpui dawn tih Mizoram mipuite hnenah ka chah duh a ni,” a ti a. Post Devolution Revenue Deficit (PDRD) Grant te pawh central sawrkarin min pe tlem tial tial tih sawiin, “MNF sawrkarin budget an pharh hnuhnung ber 2023-ah khan PDRDF an tih hi cheng vbc. 1474 a ni a, kumina kan Chief Minister leh Finance changtu ni bawkin Budget a pharh ah khan cheng vbc. 1079-ah a tla thla a ni. Nakum 2025-26 ah phei chuan vbc. 586 chauh kan dawng tawh dawn a ni,” a ti a. “Chutiang chu a nih avangin he sawrkar hian a sum neih ang angte hi Revenue thawkchhuak zawnga hmang turin a kalpui zel a ni. Lolet tur awm miah lo NLUP leh SEDP sum ral thak thakte ang ni lovin kalphung thar mipui sawrkarah chuan kalpui a ni dawn a, kan ramah rorelna tha a lo awm a, mipuiten hmasawn lam kan pan zel theih nan mipuite tawiawmna tha tak kan beisei a ni,” a ti bawk.

LAD Minister chuan LAD in kum 1953 Village Council Act & Rules an hman mek chu a hlui hle tawh tih sawiin, “Hei hi amend turin ruahmanna kalpui a ni a, VC/LC inthlan hunah chuan Dan thar hnuaiah kan inthlan theih kan beisei,” a ti a. 15th Finance hnuaia 2021-22 Grant chinfel loha awm pawh an sawrkar hnuah chinfel niin rang leh dik takin a kalna turah sum an kaltir zel tawh tih a sawi a. AH & Vety-ah hmathar lak chho mek a nih thu sawiin, “Sa ah kan intodelh loh avangin ranchaw atanga bul tan a ngai a, Thenzawl-ah Tin 72 a zau siam a ni. Vaimim hi State dang atangin kg. khat Rs. 24 in kan lalut a, Myanmar atangin hetiang tho hian kan lei bawk a, ranchaw a intodelh turin Bekang-ah Pilot Project siamin hma kan la mek a. Vaimim chinna turin Champhai District leh Saitual District te kan thlang bawk. Minority lamah hmathar lakna tur project 68 Central lamah thehthlak a ni tawh bawk a, theihtawp chhuahin hma kan la mawlh mawlh reng a ni,” a ti bawk.