MNYF ten ‘Dawt Hal Programme’ siam an tum

MNF Thalai President leh MLA Robert Romawia Royte chuan ZPM Sawrkar hotute dawt sawi hrang puangchhuak turin ‘Dawt hal Programme’ an siam tur thu a sawi.

Nimin-a MNF Hnam Run Chhung Inkhawm ah MNYF President Robert Romawia Royte chuan ZPM-a an hotuten timna nei miah lovin an sawrkar hma leh an sawrkar hnuah pawh mipui dawt an hrilh nasa nia sawiin, “Hei hi kan hnam leh Sakhuana atan pawh a thatloh avangin mipuite thudik hrilh kawngah MNF ten nasa lehzuala tanlak a tul,” a ti a. MNYF chuan mipuiin thudik an hriat theihnan ZPM Sawrkar hotute dawt sawi hrang a Video leh a Hard copy te puangchhuak turin ‘Dawt Hal Programme’ an siam tur thu a sawi a ni.

Hachhek bialtu MLA ni bawk Robert Romawia Royte chuan ZPM sawrkar hotuten khawchhhak atanga dan phalloh thil lolut te thla khat chhunga tihtawp an tiam laiin a zual tulh tulh nia sawiin, “Kuhva tawlhrutute an huangtau em em chhan hi ZPM hruaitu thenkhat vang niin a lang,” a ti a. SASCI sum lapse chu ZPM hotute Pathian tih vang nilovin 1st instalment sum Department a pechhuak lova an kawl tlat vang zawk nia sawiin, ZPM swrkar tirha CBI kuta thuneihna pumhlum (general consent) an pek chu reilote hnuah tidanglamin eirukna chhui turin State sawrkar phalna CBI in a lak zel a ngai leh ta niin a sawi bawk a. Tunhnaia Council of Minister in contractor ten Tender an chhan san theihzat leh chhan hniam theih zat bituk siam chu contract dan kalh nia sawiin, “Tender chhanna rate inang a tam dawn a, chhanna rate inangah thum an vawr zel dawn anih loh chuan mahni duhsak zawng hna inpek tumna a ang a, MNF chuan kan enzui zel dawn a ni,” a ti bawk.