Zirlai ni chunga mahni intodelh tum pawl ten Intodelh beihpui thlakna hun an hmang

Zirlai ni chunga mahni intodelh tum pawl, Students' Self-Support Union (SSU) buatsaih zirlaite tana intodelh beihpui thlakna leh zirlaite an kalna awm kawng kawhhmuhna hun chu nimin khan Aizawl Vanapa Hall-ah neih a ni.

Nimin-a he hun hman hi Art & Culture Minister C. Lalsawivunga chuan khuallian nia hmanpuiin Students' Self-Support Union-te hmalaknaa zirlaite tana pawimawh tak, intodelhna leh nakin zel atana kalna awm kawng inkawhhmuhna hun buatsaih a ni chu lawmawm a tih thu sawiin, SSU din a nih dan leh tun thlenga zirlai harsa zawkte tana mumal taka hma a la chhunzawm zelte chu fakawm a tih thu a sawi a. Intodelh thupuia nei Students' Self-Support Union-in thawhhreh pawh nei lo hruaitu entawntlak tak tak an nei thin chu Vawiin ni thlenga tha taka an kal theih chhan a ni tih sawiin, Mahni intodelh tur leh chhungkaw enkawl nan hna hnuaihnung leh zahthlak a awm loh thu a sawi bawk.

Art & Culture Minister chuan State puitling kan nih hnuah hmasawnna tam tak hmuh a nih tawh thu leh intodelh leh hmasawn tura tanlak erawh a la ngaih nasat thu sawiin, sum leh pai leh ei leh bara intodelh turin tun atangin bultan a ngai a, hei hi zirlaite'n hriaa thupuia hmanga tan an la chu lawmawm a tih thu a sawi a. Mizo kutchhuak leh tharchhuahte hnualsuat mai lova chawilara ngaihsan nachang hriat a tul thu sawiin, hei hi intodelh beihpui thlak kawnga pawimawh hmasa a ni, a ti a. Sawrkarin Hand Holding Policy hnuaiah thalai entrepreneur-te a ngaihpawimawh thu leh mahni kutke-a din tumte tan a inhawn reng thu a sawi bawk.

He hun hmanpuitu Er. H. Duhkima, Director, Project Management Unit (PMU), PHE Department chuan zirlai kalkhawmte chu tum bulbal tak nei tur leh tum ram thleng tura taimakna leh tumruhna nei turin a fuih a, SSU Gen. Hqrs. President Darhmingliana chuan hnathawh tur leh inhlawhna te zawnga intodelh tura hma an lak thin thu leh zirlai harsa zawkte SSU kaltlanga puih an nih thin dante tarlangin, zirlai ni chunga intodelhte hnenah kumtin Rs. 20,000/- leh Citation kengtel Self Support Award an pek thin thu a sawi bawk.

Students' Self-Support Union (SSU) hi May 27, 1985-ah Hrangbana College-ah din niin kum 39-na hmel a hmu tawh a. Kumtin Assembly neiin, Zirlaite intodelh nan Campaign an kalpui thin bakah Rising Day-ah Blood Donation Camp an nei thin a, heng bakah hian zirlaite intodelh leh hlawhtlin theih nan kawng hrang hrangin hma an la thin a ni. Nimin-a he hun hman ah hian PMU, PHED leh SSU Gen. Hqrs. buatsaih lehkhabu 'Duhthusam Ram' Volume-I chu a tlangzarh nghal a ni a, he lehkhabu-ah hian mithiam tak tak te'n topic hrang hrang hmangin zirlaite tana hriattur pawimawh an ziah te dahkhawm a ni.