CBI hnena General Consent pek thar sawifiah

Mizoram sawrkar-a Vigilance Department chuan Dan thar hman a nih avangin CBI hnena General Consent chu pek thar leh a ngai niin an sawi.

Hemi chungchanga nimin-a thuchhuah an siamah Vigilance Department chuan Mizoram sawrkar chuan inthlan laia mipuite hnena a intiamna angin December 28, 2023 khan CBI te hnenah General Consent a lo pe tawh tih an tarlang a. July 1, 2024 atang khan India rampuma hman turin Criminal Law thar - Bharatiya Nyaya Sanhita, 2023 chu a lo chhuah tak avangin chumi zulzui chuan Department of Personnel & Training, Ministry of Personnel, Public Grievances & Pensions chuan CBI-in a chhui theih tur Offence hrang hrangte chu a tharin a rawn chhuah leh ta tih an tarlang a. Hetianga dan thar hnuaia CBl-in offence a chhui theih tur a thara an rawn chhuah leh tak avang hian State sawrkar-in a hmaa CBI hnena General Consent a lo pek kha pek thar leh a lo ngai ta tih Director, CBI-in State sawrkar a rawn hriattir tih tarlangin, “General Consent State sawrkarin a pek dan tur pawn ruahman sa a rawn dah tel bawk a. Director, CBI-in State sawrkar ina CBI hnena General Consent a pek dan tur a ruahmanna a rawn siam ang thlapin June 27, 2024 khan Mizoram sawrkar chuan CBI hnenah General Consent a pe thar leh ta a, Official Gazette-ah 1st July, 2024 khan chhuah nghal a ni,” an ti. Hetianga a thara Mizoram sawrkarin CBI hnena General Consent a pek leh a ngaihna chhan chu Dan thar hman a lo ngaih tak vang a ni tih tarlangin, “Tunhmaa Mizoram sawrkarin General Consent a lo pek leh tuna a pek thar leh hi thil thuhmun reng a ni a, sawrkar chu a dinna ngaiah a la ding reng a ni,” an ti bawk.