Tang tlanchhuak damdawi In ah enkawl ngaiin awm

Inrinni kalta a Serchhip District Jail atanga tlanchhuak mi pahnih zinga mi Lalnunnema chu nimin zing khan man niin hliam a tawrh avangin ZMC-a enkawl tura tih a ni.
Inrinni kalta July 6, 2024-a Serchhip District Jail atanga tlanchhuak mi pahnih zinga mi Lalnunnema (31), Thantlang (Myanmar) hi July 7, 2024 (Pathianni) chawhnu lam khan Vanchengte dai-a Sawhthing hmun ah hmuh niin amah hmutu hnenah hian Phone hman a dil bakah chaw ei tur a dil a. Amah hmutu hi In lamah Phone leh Chaw la tura kirin midangte nen an zuk hmuhna lamah hian an let leh a, hei hi a lo hmuhin Lalnunnema hi Serchhip lamah tlan lehin a lum zui ta a, ft. 30 vela sang kham ah lumin a che zui thei lo a. Pathianni zan khan Serchhip District Jail thuneitute pawh rawn hiattir nghalin anni leh Vanchengte khawtlang hian lachhuakin nimin zing khan Serchhip lam rawn panpui a ni leh ta a ni.

Lalnunema hi Serchhip Police te kutah hlan niin nimin khan Serchhip Damdawi In-ah enfiah nghal a ni a, a lumna lamah hian a khup ruh pakhat tliakin a hmui a kak bakah a Ha a sawh bawk a, Jail chhunga khung chi-ah ngaih a nih loh avangin nimin khan ZMC-a enkawl tura tih a ni a, a din-hmun erawh ngaihtuahawm ni lovin amah enkawl tur hian Lungpher-a raltlan-a awm mek a nau a rawn kal bawk a ni.