Vawk thi sang khat tling tawh
Serchhip-a AH& Vety Department chhinchhiahna atanga a lan danin nimin khan Serchhip District-a Veng leh khua 10-ah ASF vanga Vawk thi 57 zet a awm leh a, Vawk thi tamna ber Thenzawl-ah 29 thiin Serchhip Kawnpui North-ah 11, North Vanlaiphai-ah 4, Serchhip Chhim Veng-ah 3, Baktawng, Keitum, East Lungdar leh New Serchhip South-ah pahnih theuh thiin Chhiahtlang leh Serchhip P&E Veng ah pakhat ve ve a thi bawk. Nimin vek khan Khua leh Veng 8-ah Vawk suat 46 a awm leh bawk a, heti hian kumin chhungin Serchhip District-a Veng leh khua 24-ah ASF vanga Vawk thi 1027 awm tawhin Vawk 2775 suat a ni tawh bawk a, Serchhip Dinthar Veng leh Darnam Veng te chu Vawk thi leh suat awmna ah tarlan thar a ni a, Serchhip Town chhunga VC zingah VC Area pakhat chauh Vawk thi leh suat awm lohna a ni tawh a ni.
Serchhip District chhung East Lungdar khuaa tunhnaia Vawk thi te chu African Swine Fever (ASF) vanga thi an ni tih finfiah a nih hnuah July 5, 2024 atang khan East Lungdar khua hi ASF hri lenna hmunah puan a ni ve leh a. Khaw dang ang bawkin East Lungdar khua atanga Vawk, Vawksa leh Vawksa atanga thil siam reng reng lakchhuah khap tlat niin Vawk talh leh Vawksa zawrh pawh khawp nghal a ni bawk.
Serchhip District-a Vawk thi leh suatna khua leh Veng 24 zingah hian Khua leh Veng 11 te chu Hri lenna hmunah hian puan a ni tawh a, khaw pakhat chu PCR hmanga Sample enfiah ah ASF hri hmuh ni mah se hri lenna hmunah puan ala ni lo a, khaw 10 te chu RAgT hmanga Sample enfiah ah ASF hri hmuh a nih avangin enfiah leh tur a ni dawn a, a dang pahnih pawh hi Sample enfiah leh tur a ni ang. Tun dinhmuna ASF hri leng avanga harsatna tawk hi chhungkua 821 niin hri len hmasakna khua ah te chuan hri hian ziaawm lam a pan deuh niin a lang.
Comments
Post a Comment