Kuhva phurchhuaktute lakah Criminal Complaint siam

Vairengte leh a chhehvel Kudam atanga Myanmar kuhva phurhchhuaktute lakah Criminal Complaint siam a ni tih Kolasib SP chuan a sawi a, tunhmaa la hriat ngai loh Kudam atangin Kuhva man belh a ni tih a sawi bawk.

Kolasib SP David H. Lalthangliana hnen atanga thudawn danin, Vairengte leh a chhehvel kudam a Myanmar kuhva awmte hi June ni 24 leh ni 25 khan enfiah vek a ni a, kudam 66 awm zinga 26-ah Myanmar kuhva hi a awm a. Hengte hi DC thuchhuah siam behchhana Dan anga hmalak turin an buaipui chho a, an hmalakna te hi July ni 1 khan kuhva chingtute pawh sawipui a ni a. Hetihlai hian July ni 2 leh ni 3-a Kudam an endik leh chuan kuhva hi thahnem tak phurhchhuah a ni tih an hre ta a ni.

Kolasib SP sawi danin heng kuhva phurhchhuah chungchangah hian kudam neitute chu thu zawhfiah a nih hnuah an lakah hian Criminal Complaint siam a ni a. Hemi an chhuina kal zelah hian Pathianni khan a hma a an hriat loh Phaisen-ah mi Inhnuai a an lo dah bakah Truck a an phurhlai an man belh thu a sawi a, hei bakah hian Vairengte-ah a hma a Kudam an la hmuh ngai loh, a hman pawh an hman tawh loh nia lang ah kuhva bag 2000 zel an hmuh belh thu a sawi bawk.

Kolasib SP chuan Myanmar kuhva phurhchhuaktute lakah hian Criminal Complaint thehlutin Kolasib DC pawhin Kudam 66 veng reng tur hian Police indaihlohna a nasat avangin District Court a thuneitute hnenah an thubuai hi ngaihtuah hmanhmawh turin a ngen laiin tunkar chho hi Kolasib District Court hi an chawlh avangin hma lak a chak thei lo tih a sawi a, Vairengte chhehvela Godown an endik hnua Godown a kuhva awm te ruk bote chu a chin hriat tumin ngawrh takin hma an la zui tih Kolasib SP chuan a sawi bawk.