Sum daihzai taka hman tum

Chief Minister Lalduhoma chuan sum leh pai an hmuh chhun chhun te fel fai leh daihzai taka hman an tum thu a sawi.

Zoram Research Foundation (ZRF) leh Aijal Club tangkawpten nimin-a Aijal Club-a ‘Symposium on State Finance: Issues and challenges’ an buatsaih a hmanpuina ah Chief Minister Lalduhoma chuan Leiba kan ngah thu leh kumtin in kawng hrang hranga senso mamawh a sang tial tial bawk tih sawiin, “Chuvang chuan sum leh pai kan hmuh chhun chhun te fel fai leh daihzai taka hman kan tum a, kan bei nasa hle,” a ti a. “Kan sawrkar hlim te khan ni 9 kan overdraft  a, kan chhawm a ni,” tiin Overdraft leh hi an tum tawh loh thu a sawi bawk.

Tunhnaiah Special Drawing Facility in sum an puk zauh zauh tih Chief Minister chuan sawiin, hei hian sawi zui a hlawh thu a sawi a. “Hei hi awmze nei, kan hlawkpui zawk vanga kan tih a ni,” tiin “A bik takin Power Bill payment rebate hmu thei tura hun reilote atana han hman hawhna a ni thin,” a ti a. Amah ngei pawhin inrenchemna hi nasa takin a kalpui thu leh inrenchemna lama hma an lak tawh chin te, hmachhawp an neih te a tarlang bawk.

Chief Minister hian Central sawrkara Security Related Expenditure Mizoram tana a dil dan te, mipui sawrkar an din theih nana Project Monitoring Committee an kalpui dan te, Non-Performing Assets lama hmalakna te leh K-deposit a kum thum aia rei sum dah tawh an thlithlai thu te, SASCI sum chu capital assets siam nan ngeia an hman tur thu te, thlai thar lei tura an intiam te chu an lei ngei tur thu te, Hand Holding hnuaiah sawrkar chu guarantor-a an tan tur thu te leh sawrkar hmalakna pawimawh dang te a tarlang a. Advisers, OSD leh Consultant, sawrkar sum sen belh mang lova an ruat chu sawrkarin a hlawkpui thu pawh sawiin; Chief Minister Office thunei leh chak taka an buatsaih mek thu leh CM office ttanga Mizorama project awm zawng zawng uluk taka vil tlat an tum dan te a sawi bawk.