Chhimlam kawlphetha harsatna sawihona neih a ni
Power & Electricity Minister F. Rodingliana hovin nimin khan a Pisa-ah chhimlama kawlphetha pek kawnga harsatna hrang hrang leh a chinfel dan tur bialtu MLA-te leh Power & Electricity Department Official-te chuan an sawiho.
He sawihona hunah hian Lawngtlai East Bialtu MLA leh Adviser to Chief Minister Dr. Lorrain Lalpekliana Chinzah bakah Lawngtlai West bialtu MLA C. Ngunlianchunga, Tuichawng bialtu MLA Rasik Mohan Chakma, West Tuipui bialtu MLA Prova Chakma leh Palak bialtu MLA K. Hrahmo te an tel a. MLA te hian an bial chhunga harsatna hrang hrang te an sawi a ni. He hunah hian kawlphetha pekna chungchanga harsatna te tarlan niin, Chhim lam chawmtu Khawiva leh Chawnhu inkar line-ah harsatna a awm thin thu leh power mamawh lo sang zel bawk nen Khawiva leh Chawnhu inkar line hian a zawh loh avanga hmalakna awm mek te, Cyclone Remal avanga Melriat to Khawiva 132kV Tower, Aibawk thlanmual hnuaiah leiminin a hnawl avanga harsatna awm te leh Chawnhu Sub-Station Panel kang avanga harsatna awm te tarlan a ni a. P&E Minister chuan power-a intodelh tur leh mipuiten power tha taka an hmuh theihna turin Sawrkar-in chak takin hma a lak chhoh mek thu a sawi bawk.
Comments
Post a Comment