Governor hovin Rel kawng siam mek dinhmun thlirho

Mizoram Governor Dr. Hari Babu Kambhampati chuan KM 51.38-a thui Bairabi - Sairang New Line Project chungchang ah nimin khan Northeast Frontier Railway (NFR) Engineer-te chu Raj Bhavan-ah Review Meeting a neih pui.

He hunah hian NFR atangin Chief Engineer (Construction) Vinod Kumar leh a thawhpui ten he Rel kawng siam meka hmasawnna an neih te Powerpoint Presentation hmangin an sawifiah a. Mipui tana Rail Service a himna turin Relkawng siamna bungrua te la bo lo turin ngenna an siam nawn leh a. Rail a rawn luh hunah Relkawng in a tan tlang mipuite chu Rel tlan hun chhunga Rel kawng kan lo tur leh hnaih lo tura fimkhur turin an chah bawk.

Report-a tarlan angin he Rel kawng siam meka Project senso hi ennawn a nih hnuiin cheng vbc. 8213.72 a ni a, tun dinhmunah hian Physical works-ah 93% chu zawhfel a ni tawh a. He Rel kawngah hian Station pali a awm a, chungte chu Hortoki, Kawnpui, Mualkhang leh Sairang te an ni. Bairabi leh Sairang inkar line thar KM 51.38-a thui hi Section pali-ah then a ni a, chung te chu Bairabi – Hortoki, Hortoki – Kawnpui, Kawnpui – Mualkhang leh Mualkhang – Sairang te an ni.

NFR-in Bairabi – Hortoki Section-a Trial run hlawhtling tak a lo neih tawh avangin Hortoki Station hi tun thla chhunga hawn tum niin Mizo-ram-ah Hortoki thleng rel a rawn lut tawh dawn a. Kumin ah tho hian Hortoki – Kawnpui Section leh Kawnpui – Mualkhang Section te pawh relin a zawh thei dawn a. Kum 2024 July thla chhungin Sairang Terminal Station hi hawn hman tum a ni.

He hunah hian Governor chuan Central Sawrkar leh Indian Railways te chungah lawmthu sawiin, Rel hian Mizoram leh a thenawm State Assam inkara zin hun a tihtlem bakah passenger leh bungraw phurh senso nasa taka a tihtlem tur thu a sawi a. Darkar 3 atanga darkar 4 vel laiin Mizoram leh Assam inkara zin hun a pawt tawi dawn niin a sawi bawk.