Society kaltlangin khaw tinah thlai thar lei tum a ni

Cooperation Minister PC. Vanlalruata chuan Sawrkar in Society kaltlangin khaw tinah Hand Holding Policy hmangin thlai thar lei a tum thu sawiin, hemi atan hian Society din chhoh mek a nih thu a sawi bawk.

Mizoram State Cooperative Union Ltd. (MSCU) leh Mizoram Cooperative Apex Bank Ltd. (MCAB) tangkawp buatsaih tun thla ni 12 thleng awh tur 'Training on Common Accounting System & Systematic Audit of Primary Agriculture Credit Cooperative Society for Cooperative Officers, Mizoram' hawnna hun nimin-a MSCU Training Hall Aizawl-a neih a hmanpuina ah Cooperation Minister chuan Sawrkar laipui leh State Sawrkarin PACS tihhmasawnna lam a ngaihpawimawh thu sawiin, Sawrkar in Society kaltlangin khaw tinah Hand Holding Policy hmangin thlai thar lei a tum thu leh hemi tur hian Society-te din chhoh mek zel a ni tih a sawi a, ‘Hengte siamrem leh enkawl hi kan mawhphurhna a nih dawn avangin kan intuaithar angai hle a ni,” tiin he huna tel Cooperative Officer te chu a chah a ni.

Cooperation Minister chuan Mizoram ang ram zim tak, a chhunga chengte pawh a tlangpuiin hnam ziarang rualkhai leh khawsak phung inang takah Cooperative Movement a kal fuh chuan hmasawnna nasa taka a thlen thei tih sawiin, kan mutan te kan hriata kan tih bo theih chuan Cooperative Movement hian changkanna a thlen dawn a, hemi tur hian kan lo inpuahchah lawk pawh angai a ni, a ti a. Training tura Mizoram hmun hrang hrang atanga kalkhawm Cooperative Officer-te chu Mizoram tana darthlalang an nih thu a sawi bawk a ni.

Registrar of Cooperative Societies (RCS) R. Lalremsanga pawhin Cooperation Department chu department upa tak, UT hunlai atanga kalpui a nih thu sawiin, tun aia sang leh hmasawn zawk an nih theih nan theihtawp an chhuahtlan a tul thu a sawi a. Tun dinhmunah PACS 25 te Computerization kalpui mek niin kum tharah a dang 30 ah te kalpui leh tum a nih thu sawiin, PACS chu thingtlang mite tana tangkai tak a nih avangin ngaihpawimawh zel tum a ni tih a sawi a. Society-te chu Sawrkarin Hand Holding Policy kalpui nan hman tangkai a tum thu a sawi bawk.

PACS bik Audit hi Society pangngai Audit aiin a danglam avangin Coopertive Officer te'n an hriat fiah lehzual nan training hi buatsaih a ni a. Training-ah hian Cooperation Department hnuaia District hrang hranga Cooperative Audit Officer (CAO) te, Mizoram State Coopertive Union Ltd. (MSCU) hnuaia Cooperative Development Officer (CDO) leh Field Education Officer (FEO) te, National Cooperative Union of India (NCUI) hnuaia Coopertive Education Instructor (CEI) te leh Autonomous District Council hnuai Cooperation Department-a Inspector-te an tel a ni.