Adviser to CM ruat Danpui kalh a nih thu thlen

PC Party President Vanlalruata chuan ZPM kaihhruai sawrkara Adviser to CM tura mi 5 ruat chu Danpui kalh a nih bakah mipui sum khawhralna a ni tih sawiin, hemi chungchang hi nimin khan Larsap leh ZPM Val Upa Council hnenah an thlen.

PC Party ten lehkha an thehluh chungchang hi sawiin an President Vanlalruata chuan, Minister ngah lutuk chu tul lova mipui sum khawhralna nia sawrkar laipuiin a ngaih avangin kum 2003 khan Mizoram in Minister a neih theih zat chu 12 aia tam lo ah a dah niin a sawi a, tuna Adviser to CM panga an awm avanga mipui sum senral belh tur chu cheng nuai 845 chuang niin an chhut thu leh tun term hi an hmang tluan anih chuan hei aia tam fe hi an sengral dawn niin a sawi bawk a. Heti zat mipui sum khawhral thlawnna tur Danpui kalh ni bawk chu tihtawp nghal a tul avangin PC Party chuan Larsap leh ZPM VUC hnenah thu an thlen ta tih a sawi a ni.

Vanlalruata chuan, hetiang kalphung phuahchawp hmanga hmalakna chu mipui bakah Court pawhin a ngaimawh hle niin a sawi a, kum 2008-a Mizoram-a Parliamentary Secretary pasarih (7) ruat te pawh Court in a lo paihtir vek tawh tih sawiin, tuna an lehkha thehluh chu Larsap chuan Dan anga hma a lak ngei an beisei tih a sawi bawk.