Public Accounts Committee hmalak tumna puang

Mizoram Legislative Assembly-a Public Accounts Committee (PAC) chuan nimin khan thuthar thehdarhtute kawmin mipuite laka an mawhphurhna hlen tur leh sawrkar sum luangral tur hum an tum dan te an puangzar.

Assembly Annex Conference Hall-a thuthar thehdarhtute an kawmna ah PAC Chairman Lalchhandama Ralte chuan India-a kan hman Parliamentary Democracy-ah Assembly Committee-te hian hmun pawimawh tak an luah thu leh Parliament-a Parliamentary Committee hrang hrang a awm laiin State-tinah Assembly Committee a awm thu a sawi a. Heng Committee-te hian Assembly aiawhin Assembly-in a tih tur hrang hrang chanvo leh thiltihtheihna te chu Rules of Procedure and Conduct of Business hmanga hlanchhawngin he Rules of Procedure and Conduct of Business hi India Danpui Article 208 hnuaia Assembly-in a siam a ni tih a sawi a. Assembly Committee-te hi Assembly aiawha Assembly chanvo hrang hrang hlentu an nih angin Session loh laia thukhawm thin ni mah se 'Assembly in Session' anga ngaih a nih thu leh heng Committee hrang hrangte zinga upa ber chu Public Accounts Committee hi a ni tih a sawi bawk.

PAC Chairman chuan Sawrkar Department-te’n mipui sum an hman dik tawk lohna hi Audit Report hmanga hailan a lo nih fo tawh thu leh PAC pawhin hriatthiamna thui tak a nei tawh thin tih sawiin, chu chu remchangah lain sawrkar ban pakhat Legislature zahawmna leh thuneihna chu Executive lamin palzam chang a nei ta deuh em tih ngaihdan a awm thu leh hemi chungchang hi 9th Mizoram Legislative Assembly-a Public Accounts Committee thukhawm chuan uluk taka a ngaihtuah hnuah mipuite laka a mawhphurhna hlen tur leh sawrkar sum luangral tur hum a tum dante hi puanzar tha a tih thu a sawi a ni.

Mipui sum (public money) tih chingpen chungchang thu-ah Public Accounts Committee chuan a tul ang leh dan anga hmala tur a nih angin ram leh hnam tana hmalak a hreh dawn lo tih PAC Chairman chuan sawiin, hei hi Department-te pawhin chiang takin hria se an duh tih a sawi a. “A tul anga Enquiry chak zawka lain, Evidence koh kawngah leh case bawhzui kawngah khauh zawka kal ngei a tum a, chumi tur chuan Audit Report piah lamah Compliance Report pawh uluk takin a zir a, a tul ang zela 'Spot Verification’ nei tur pawhin a inpuahchah nghal bawk,” a ti a. “Sum hman dan felhlel nia langte chu en liam mai loin, term liamta a Public Accounts Committee Observation-te lo neih sa te pawh chak takin a bawhzui mek zel a, Audit Report-a parawise-comment hrang hrang atangin a hmun ngeia tlawh tur pawh engemaw zat a thlang fel tawh nghe nghe a ni,” tiin m ipui sum hmanna pawh dik taka hman a ni ngei em tih bawhzui kawngah theihtawp chhuah an tum thu a sawi a ni.