Social Welfare Minister in Lunglei-a Home a tlawh

Social Welfare Department changtu Minister Lalrinpuii chuan nimin khan Lunglei-a Observation Home leh Special Home Pukpui te chu a tlawh.

Heng Home a tlawhna ah hian Minister hi Lunglei Observation Home Superintendent HV. Lalrinawma leh Special Home-a Superintendent, Dr. Lalrempuii te bakah thawktu dang ten lo dawngsawngin Mizoram-a chengte hi tlemte kan ni a, chuti chung chuan naupang humsual dai palh enkawltur kan nei ve reng tih Minister chuan sawi a, chutiang naupang te enkawlna tur sawrkarin hmun a nei chu lawmawm a tih thu leh vanneihthlak a tih thu sawiin, Thawktute rilru hi naupang te rilru putzia-ah a lo langchhuak vat thin a, chuvangin thawktute pawh theihtawp chhuah a an rawngbawlna hlenchhuak ngei turin Minister chuan a fuih hlawm bawk a ni.

Remand Home tia hriatlar thin, tuna ‘Observation Home’ ni ta leh Special Home kalphungte bakah Juvenile Justice Act hnuaia naupang kum tlinglo humsual daite nunkawng dik an zawh a, mahni kea ding thei tura an tanpui dan te leh Home an chhuahsan hnua follow up an neih dan te leh hmalakna an neih hrang hrang te bakah an mamawh te pawh Minister hnenah hian an lo thlen nghal bawk a ni.

Social Welfare Minister hian Mission Foundation Movement (MFM) bul tuma chhungkaw harsate chhawmdawlna tura Ar note semna hun chu nimin khan Lunglei Farm Veng Community Hall-ah a hmanpui bawk a, Ar note dawngtute chu an thil dawn chu bei tham hlein lang mah se tangkai taka hmang zui thiam turin a chah a, beneficiary-ten rinawm tak leh taima taka hma an lak a, an hlawhtlinpui a nih chuan midang tam zawkin an dawn belh theihna tur kawngte pawh a inhawn zel a beisei thu a sawi bawk. He hunah hian Lunglei District chhung thingtlang khaw 13 leh Lunglei khawpui Veng pali-a chhungkaw 70 hnenah Ar note 15 theuh leh a chaw semchhuah a nih thu tarlan a ni.