Diet and Biomarker Survey in India nei dawn

Tun thla atang hian Mizoram District paruk (6)-ah ‘Diet and Biomarker Survey in India’ tih thupui hmangin zirchianna neih a ni dawn.

The Indian Council of Medical Research-National Institute of Nutrition, Hyderabad chuan ‘Diet and Biomarker Survey in India’ tih thupui hmang hian ramchhung zirchianna a nei dawn a, Mizoram-ah chuan Mizoram sawrkar, Zoram Medical College (ZMC) leh The Indian Council of Medical Research-National Institute of Nutrition (ICMR-NIN) tangkawpin he zirchianna hi July 2024 atangin thla 6 chhung District thlan bik 6 Aizawl, Champhai, Kolasib, Lunglei, Mamit leh Siaha-ah te an nei ang.

He zirchianna-in a tum ber chu mipuiten India rama nutritional (chaw tha) an lakluh dan dinhmun enchianna a ni. Hei bakah hian mipuite thisen tlakchham (anemia) leh micro-nutrient (Vitamin leh Minerals) tlakchhamna tlanglawn an neih dan enfiahna a ni. Heng zirchianna hi a hrang hrangin an then a: naupang kum 5 hnuailam, kum 5-9 inkar, tleirawl/rawlthar, puitling leh kum upa lamah te then a ni.

Zirchianna hi mi thlan bik 24 ten an nei dawn a chungte chu: Medical Officers-2, Nutritionist/ Dieticians-2, Phlebotomists/Lab Techician, Social Workers leh Antropologists te an ni ang. He zirchianna hi in tinah neih tura ruahman a ni a. An thlahtute atanga zirchianna, natna benvawn an neih dan, ni khat chhunga an ei leh in lakluh, an chaw lakluh dan kimchang leh an thisen test atanga neih tum a ni a, he zirchianna hian Mizoram mipui dinhmun dik tak, an thisen tlakchham dan dinhmun leh an diet (chaw tha lak luh) dan a entir dawn a ni.