Siaha District a phurhluh tur Diesel man a ni

Lawngtlai District chhung Bualpui NG-a Young Lai Association (YLA) Sub-Hqrs. hruaitute leh Police duty ten Siaha District a phurhluh tur Diesel Barel 57 chu nimin zing khan an man.

Tarlan tawh angin Myanmar Rakhine State-a Tuialhthei phurhluh thin chu tihtawp a nih theih nan Central Young Lai Association chuan June 24 atang khan helam khawih thinte chu tawpsan tura ngenin, Lawngtlai District chhunga hmun pawimawh zual ah duty an indah zui a, Bualpui NG-a duty te hian nimin zing khan Pik-Up Truck paruk hmanga phurh Diesel Barel 57, Litres 12,312 chu Lungpuk (Myanmar) ramri, Siaha District-a kalpui tur nia sawi chu an man a, heng Diesel te hi Aizawl atanga rawn phurh a ni.

Rakhine State-a Oil phurhluh thin tihtawp chungchangah hian Central YLA General Secretary Joseph Lalhmingthanga Chinzah chuan chhimlam District pathum-a DC leh DCSO ten khapna thuchhuah an siam hnuah phalna mumal nei lova Rakhine State-a Oil thawnluh a nasat thu leh Central YLA chuan a ngaimawh thu a sawi a, Rakhine State-a Helho chu Myanmar a tlangmi, Chin unaute tana hnawksak tak an nih avangin kan unaute do nan Rakhine State-a an mamawh thawnluh chu thil tihawma an ngaihloh avanga khap an nih thu a sawi a ni.

Hetihlai hian Siaha District Pump Owner chuan thuchhuah siamin nimin zing dar 8:00 atang khan tiamchin awm lovin Siaha District chhunga Petrol Pump-te chu khar a ni dawn tih an tarlang thung a. Siaha District Pump Owner chuan June 30, 2024 tlai atang khan Siaha District ta tur Oil phur Tanker-te chu Central YLA-ten Lawngtlai khawdai ah kaltlang phal lova an hren beh sak avanga Petrol Pump hi khar tum an nih thu sawiin, Siaha District chhunga Petrol Pump mai ni lovin Siaha mipuite zahlohna nia an ngaih thu an sawi a. “Sawrkar lam hotuten theihtawp a hma min laksak chung pawhin kan District chanvo tur Oil Tanker-te chu min la hren beh sak tlat avangin, Oil Tanker-te an release kim hma chu keini Siaha District chhunga Petrol Pump-te chuan kan lungawi lohzia lantir nan tiamchin awm loin kan inkhar rih dawn a ni,” an ti.

Central Young Lai Association chuan nimin khan thuchhuah siam ve nghalin Siaha District tana Oil phur Tanker-te hi dang lovin an vaia kaltlangtir vek an ni thin tih tarlangin, amaherawhchu tunhnaiah Siaha District chhunga Filling Station neitute hminga tanker rawn kal, mahse Siaha khawpui chhungah pawh luhtir lova Myanmar lama dan lova kaltir nghal an awm ta fo niin an tarlang a. Mipui chan ve phak loha Filling Station kawngbo a Pump awmlohna Myanmar ramri hnaih a phurh a ni fo chu sawrkar thuchhuah ngaih pawimawh lohna leh ram mipuite hrekna leh zahlohna lian tak nia an hriat thu an sawi ve thung a ni.