Serchhip District-a MHIP Branch ten MHIP Golden Jubilee lawmna hun an hmang

Inrinni kalta July 6, 2024-a MHIP Day vawi 50-na lawmna chu Agriculture Minister PC. Vanlalruata chuan Chhingchhip-ah hmanpuiin Adviser to Chief Minister Lalmuanpuia Punte chuan Keitum khua ah a hmanpui bawk.
Chhingchhip Venghlun Branch MHIP in MHIP Day vawi 50-na lawmna hun Chhingchhip Community Hall-a an buatsaih ah hian Agriculture Minister chuan MHIP member kalkhawmte chu MHIP Golden Jubilee lawmpuina chibai bukin, MHIP te chuan Mizoram hmasawnna leh kal zelna turah mawhphurhna pawimawh tak an chelh tih a sawi a. Chhungkua-ah nu te an pawimawhna sawiin, fate enkawlna kawngah pa te ai mahin an mawhphurhna a sang zawk a tih theih a, thalai ten sual kawng an zawh lohna turin nu ten tan an lak nasat a ngaih thu te sawiin, MHIP te chu khawtlang tana tangkai, Society siamtha tura pawl pawimawh, hmeichhe chawikanna leh humhimna mai piahlamah khawtlang siamthatna kawnga thawhlawk an ni tih a sawi bawk.

Chhingchhip Venghlun Branch MHIP ten MHIP Golden Jubilee an lawmna hun hi an President Hmingthanzauvi chuan kaihruaiin khual zahawm atan Dr. Andrew Lalramliana, Chhingchhip PHC chu hman a ni a, he hunah hian kum kalta chhunga an chetvelna report ngaihthlak niin MHIP General Headquarters Aizawl atanga Golden Jubilee pual thuchah leh chibai bukna chhiar chhuah a ni a, an Member boral mi pahnih sunna hun hman a ni bawk.

Keitum Branch MHIP te pawhin MHIP Golden Jubilee hi Keitum-a Sawngkhara Hall ah hmangin Bialtu MLA leh Adviser to Chief Minister Lalmuanpuia Punte chuan khuallian niin a hmanpui bawk a, Nu te pawimawhna hrang hrang sawiin, nu ten an fate an kawm tam a tul thu leh nu fel chuan fa fel an neih thin thu te a sawi bawk. He hunah hian Padma Shri dawngtu KC. Runremsangi leh Inter-District Weightlifting Championship-a Gold Medal latu Zosangzuali te hnenah chawimawina an hlan bawk a ni.

Neihloh Branch MHIP ten MHIP Golden Jubilee an lawmna hun chu Serchhip Bialtu MLA leh Chief Minister Lalduhawma nupui, Liansailovi chuan a hmanpui bawk a, Mizoram in hmasawnna kawng a zawh mek thu sawiin, mipui ten ram roreltute thu kan zawm a tul thu leh kan thawhpui a ngaih thu a sawi bawk. Liansailovi hian Bialtu MLA hmingin Neihloh MHIP Run sakna tur cheng nuai thum (3) hlanin MHIP Day lawmpuina atan Rs. 10,0000/- a hlan bawk a, hemi rual hian YMA hnenah Infiamna bungrua te a hlan nghal bawk a ni.