Serchhip District Jail atanga tlanchhuak zawng mek

Silaimu man avanga thubuai nei mi pahnih te chu Inrinni khan Serchhip District Jail tanga tlanchhuakin he thu buatsaih lai thleng hian man leh an la ni lo.
Thudawn danin heng Jail tang tlan-chhuak te hi Lalchhanhima (44) S/o Zabiaka (L), Leisen (Myanmar) leh Lalnunnema (31) S/o Lalkima (L), Thantlanga (Myanmar) nia insawi te niin thla hmasa June 7, 2024 khan Silai AK-47 mu (7.62x39mm) 1980 an kawl kaihhnawih ah Serchhip Darnam Veng atanga man te an ni a, Arms Act bakah MV Act leh Foreigner Act hnuaia thubuai siam sak niin man leh ngei tumin hmalak nghal a ni a, he thu buatsaih lai thleng hi chuan man an la ni leh lo thung, 

Serchhip District Jail Superintendent C. Lalbiaktluanga hnen atanga LENKAWL in thu a dawn danin Serchhip District Jail-a tang te hian Inrinni khan ni dang ang bawkin Chhun-a Thingpui an in zawh hnuah Jail Tual-ah Volleyball an khel a, Volleyball an khelh zawh hnu dar 2:00 velah Volleyball, Net leh Net Ban te chu Office-ah tang te hian an dahlut a. Hemi rual hian Lalnunnema hian Gate vengtu chu biain a chhung ten sum an lo thawnna turin Gpay chungchang a zawt a, Office lama hemi buaipuitu In lama awm chu a biak sak dawn laiin Lalchhanhima hi rawn chhuak bawkin an buai lai tak hian Jail Main Gate atangin an tlanchhuak a, Duty te hian um zuiin han in pawt hman deuh mah se Jail hungna leh Quarters inkarah an putchhuak a, Serchhip Police Station-ah FIR thehluh nghal a ni bawk.

Serchhip District Jail Superintendent chuan tun tum hi Serchhip District Jail atanga tang tlan-chhuak an awm hmasak ber a nih thu leh a hma lama tlanchhuak te chu Court-a hruai an nih lai te a tlanchhuak an nih thu a sawi a. Tun tuma Jail tang tlanchhuak te hian khawchhak lam panin Tuikum an pan nia hriat a ni a, Inrinni zan khan zankhua a zawngin nimin thleng khan zawn zui an ni a, an chin erawh hriat belh a awm rih lo thung a ni.