Serchhip DDMA in Baktawng Chan In-a khuarel chhiatna tuartu chhungkuate chhawmdawlna hlan

Tunhnaia ruahpui nasa tak sur avanga khuarel chhiatna thlenga Serchhip District chhung Baktawng Chan In-a chenna In chhuahsan chhungkaw pasarih te hnenah Serchhip District Disaster Management Authority chuan niminpiah khan tanpuina sumfai an hlan.
Serchhip District Disaster Management Authority (DDMA) aiawh hian niminpiah khan Zonal Officer Lalhruailiana Zote SDC leh a Team te chu Baktawng Chan In-ah kalin thil thlen dan te a hmunah an enfiah a. May 28, 2024 a ruahpui nasa tak sur avang khan Baktawng Chan in-ah hian leimin nasa tak a thleng a. Chenna In pahnih chu leimin hian a hnawl bo a ni. Chumi kal zelah chuan kawng chhak lamah leikhi zau tak takte a insiam bawk a. Chhiatna thlen hlim chhawnah hian Verification Team te intirin DC Office aiawh Official ten vanduaina tawk te hi an lo tlawhchhuak tawh a. Chenna In chhia bakah leimin leh leitawlh avanga kawng hnawh te leh chhiatna dang thleng te pawh kalchilhin Silpaulin leh tanpuina tul dang te pek an lo ni tawh a ni.

Tuna kawng chhak lama lei khi zau tak avang hian Baktawng Chan In-ah hian chhungkaw pasarih (7)te chu leimin a awm leh thut theih avangin an chenna In atangin an inthiarchhuak a. Heng harsatna tawk chhungkuate hnenah hian SDRF norms angin Gratuitous Relief (GR) tanpuina sumfai hlan an ni a. Sawrkar in inkaihhruaina a neih ang hian chhungkaw pakhat-a puitling te chu MGNREGS rate anga puih theih niin mi pakhat tan ni khat ah Rs. 266/- zelin ni 30 chhung atan tanpuina hi hlan theih a ni a. Hemi ang hian chhungkaw paruk-a mi pahnih theuh an vaiin mi 12 leh chhungkaw pakhat-a mi pakhat, an vaiin mi 13 te tan tanpuina hi pekchhuah a ni.

Baktawng Chan In tlawhtu Official te hi Village Council member te leh khawtlang hruaituten an lo dawngsawng a. Chhiat tawk te kokhawmin Community Hall-ah chhawmdawlna sumfai inhlanna programme an hmang a. He hunah hian Sawrkarin hmalak a tum zelna pawh in hrilhhriat a ni bawk.