Serchhip-ah GST chungchang inzirtirna neih a ni

Taxation Department buatsaihin nimin khan Serchhip District chhunga sumdawng te tan 'Goods and Services Tax' (GST) chungchang inzirtirna neih a ni.
Serchhip Kawnpui VC Hall-a GST Awareness Programme hi Asst. Commissioner of State Tax, Serchhip Zone Vanlalruata Ralte chuan kaihruaiin Joint Commissioner of State Tax leh GST Nodal Officer C. Vanlalchhuana chuan he huna kalkhawmte hi GST chungchang a hrilhfiah a. Ram hmasawnna atan Chhiah kan pek a ngaih thu sawiin, sumdawnna thatna hmun ah mipui ten hma an sawnin Chhiah pek pawh a tam thin thu a sawi a. Taxation Department pawhin mipui ten awlsam zawka Chhiah a pek theih dan turte an ruahman zel thu leh GST pawh mahni a pek theih tura ruahman a nih thu te a sawi a, mahni a pe thei lo te tan pawh Department lamin a thlawna an tih sak theih thu te a sawi bawk.

He hunah hian sumdawnna a than theihna turin Dan anga chhiah pek a tul thu te, chumi atan chuan a hmasa berah sumdawng ten GST Registration an tih a tul dan te leh hemi kawnga hriat tur pawimawh hrang hrang inzirtir a ni a, GST Registration leh PAN Card in hman hawh tir a him loh theih dan te tarlan a ni bawk.

India ramah hian Chhiah lak dan, Goods and Services Tax (GST) hi July 1, 2017 atang khan hman tan a ni a, he Dan hnuaiah hian mi tu pawh bungrua zawrhchhawn hmanga sumdawng emaw, Services hmanga sumdawng emaw ten an sumdawnna atanga kum khat chhunga an sum lakluh in threshold limit a pel a nih chuan GST Dan hnuaiah Registration an nei ngei ngei tur a ni a. Hemi ang hian NE State bik a mite chuan kum khat chhunga Chhiah laka bungrua zuartu ten cheng nuai 20 man aia tam sum an lalut emaw, Chhiah lakna Service petu ten cheng nuai 10 man hu aia tam an pechhuak emaw a nih chuan GST Dan hnuaiah Registration hi an tih ngei ngei a ngai tawh a ni.