Serchhip District-ah Child Adolescent Labour leh Child Trafficking kaihhnawih thubuai ala awm lo
Serchhip DC Conference Hall-a Child Adolescent Labour leh Child Trafficking chungchang inzirtirna Sensitization Workshop hi Serchhip District Bawrhsap Paul L. Khuma chuan khuallian nia hmanpuiin dan kalha naupang kumtling lo hnathawka chhawr luih (Child Adolescent Labour) leh naupang hralha sumdawn (Child trafficking) chungchangah Serchhip District chuan tun thlenga thubuai a la neih loh thu leh lawmawm a tih thu a sawi a. Chutihrual chuan hetiang thil hi kan chungah leh kan khawtlangah a thlen ve lohna tura tan kan lak a tul thu leh a zirtir chhawngtu leh pu darhtu ni turin mitin te kan pawimawh thu a sawi a. Naupang kumtling lo hnathawka chhawr chungchangah tum reng vang ni lo, hriatlohna avanga dan kalha naupang hnathawk a chhawr te kan lo awm thei tih sawiin, “India ram Dan in Child Labour a hrilhfiah leh a khap dan kalphung te, inkaihhruaina leh hremna awm thei te kan inzirtir nasat a ngai hle,” a ti a. “Kan rinlohna lam atangin inbumna avangin Child Trafficking tuartu kan lo ni reng thei tih te hriain, fimkhur a ngai a; khawtlangah pawh inzirtir a ngai hle,” tiin Sensitazion Programme pawh neih chhoh zel tum a nih thu leh nimin-a he hun buatsaiha kalkhawm te pawh mi dangte hrilhchhawngtu ni turin a chah a ni.
Nimin-a he hun hman hi Serchhip Addl. DC Lalrinzuala chuan kaihruaiin Resouce person atan District Child Protection Officer Lalsiampuii leh Lalrinhlua, Advocate te hman an ni a, anni hian Child Adolescent Labour leh Child trafficking chungchangah kalkhawmte zirtirna pein he hunah hian Official te leh VC, Khawtlang hruaitute, NGo leh Bazar-a thil zuar te bakah thuthar thehdarhtute an tel a ni.
He huna tarlan a nih danin Child and Adolescent Labour (Prohibition and Regulation) 1986 chuan naupang kumtling lote an taksa leh rilru hriselna atana him lo eizawna hmuna hnathawka chhawr a khap a. Naupang kum 14 hnuailam te phei chu an zirna tibuai zawngin eng hna mah thawh phal a ni lo a. Hna reng reng naupang theihna leh zahawmna hlohtirtu emaw, naupang taksa leh rilru hmasawnna leh thanna dal theitu emaw, an zirna tibahlah tirtu emaw, zirna chawlhsan ngai khawpa thawh ngai hna te reng reng khap tlat a ni. Tleirawl te hi zan dar 7:00 atanga zing dar 8:00 inkarah inhlawhfaa chhawr phal a ni lo a. An taksaah danglamna leh hmasawnna la insiam mek te an nih avangin an hriselna atana pawi thei tur te, an nunna atana hlauhawm ang chi reng rengah inhlawhfak khap a ni a. Chhawr lui an awm a nih chuan dan anga hrem theih an ni.
Mihring hmanga sumdawnna (Human Trafficking) hi khawvela Organised Crime hluar ber dawttu a ni a, Human Trafficking thleng zinga a tuartu za zela 27 chu naupang (Child Trafficking) case a ni a. Mizoram-ah hian April 2019 atanga June 2024 chhung khan Child Trafficking Case hi 23 awmin Hmeichhia 10 leh mipa 13 an ni a. Serchhip District-ah erawh Child Trafficking Case hi a la awm lo a ni. Serchhip District-ah hian Anti-Human Trafficking Unit din niin Child Trafficking Case bik khawihtu tura ruat an ni a. Inkaihhruaina mumal tak neiin an kal a, training pawh vawi engemawzat an nei tawh a ni.
District Bawrhsap kaihhruaina hnuaiah Vigillance Team for Inspection and Monitoring on Prevention of Illegal Transportation of Children chu Serchhip-ah din a ni tawh bawk a. He Team hian a vawikhatna atan Serchhip-ah Child Labour leh Trafficking a awm leh awm loh enfiah turin Rescue Operation chu July ni 11 leh 12 hian Serchhip-ah an nei dawn a ni.
Comments
Post a Comment