Serchhip-ah Home Minister hovin Criminal Law thar hman tanna hun hman a ni
Heng Dan thar pathum (3) te hman tanna puala inkhawm tawi Serchhip SP Conference Hall-a neih ah hian Home Minister K. Sapdanga chuan India ramin hun rei tak Criminal Law a lo hman tawh Indian Penal Code (IPC), Code of Criminal Procedure (CrPC) leh Indian Evidence Act te thlakna tur Dan thar pathum hman tan a ni dawn ta chu India ram khua leh tuite leh Mizoram tan sual dona kawngah kalphung thar leh bung thar pawimawh leh chhinchhiahtlak tak a nih thu a sawi a ni.
Home Minister chuan IPC Dan chu kum 1860-a siam a nih thu leh kum 164 zet a nih tawh thu sawiin, Cr. PC kan hman mek chu kum 1898-a siam, 1973-a siamthat niin kum 51 kalta a mi a nih thu leh Indian Evidence Act chu kum 1872 atanga hmangin kum 152 zet kan lo hman tawh thu a sawi a, India sawrkar pian hma daih atanga India mipuite chunga Dan lekkawh tur hi siam a lo nih tawh thu sawiin, siamthat a hun tawh thu a sawi a. Sawrkar laipui in hun rei tak a inbuatsaih hnuah peihfel a nih tak thu leh Dan thar ni mah se Dan hlui-a a tha lai te paih chuang si loin tunlai khawvel thiamna Technology hman theih turin siamrem a ni, a ti a. “He Dan thar hian mipui mimir te thlavang na takin a hauh a, Police te kut a tichak a, Police te hna nasa takin a tipung a, sual bul intan hmeh mih nan sual lakah nasa takin a thikthu a tichhia a, a then laiah a thil phal viau laiin a then laiah a khauh em em a, ram leh mipui tana dan tha tak a ni dawn,” a ti bawk.
Indian Penal Code, 1860 chu Bharatiya Nyaya Sanhita (BNS), 2023 chuan thlakin, Code of Criminal Procedure, 1973 chu Bharatiya Nagarik Suraksha Sanhita (BNSS), 2023 chuan a thlak a, Indian Evidence Act, 1872 chu Bharatiya Sakshya Adhiniyam (BSA), 2023 chuan a thlak bawk tih Home Minister chuan sawiin, hetiang Dan thar tha tak kan nei chu lawmawm a tih thu a sawi bawk.
Heng Dan thar pathum (3) te hmang tan tura bul tanna hun hi Serchhip SP MS. Dawngkima chuan kaihruaiin Serchhip Addl. SP Saidingliana Sailo chuan he Dan chungchang a sawifiah bakah Serchhip District Court-a Asst. Public Prosecutor (APP) Laithanpuia pawhin he Dan hmang tura an inbuatsaihna te a sawi bawk a. Heng dan thar pathum te hian Dan hmanlai thenkhat paihin a then a kaikawp a, a hmaa hriat ngai loh sualna thar lo chhuak te hremna a dah belh a. Khawi Police Station-ah pawh FIR thehluh theihna Zero FIR te, Online hmanga Police hnena FIR thehluh te, SMS leh thildang hmanga inkoh (summon) te, dan bawhchhiate hremna atan Vantlang tana thil tha tih, Community Service te leh thil dang thahnem tak heng dan tharah hian dah belh a ni bawk.
Heng Dan thar te hmang tur hian Serchhip SP Office huaihawtin training vawi sawm chuang neih a nih bakah Kohhran-ah leh tlawmngai pawl zingah Awareness Campaign neih niin neih zel tum a ni bawk.
Heng Dan thar te hi tunlai thiamna mil a siam a nih avangin a nihna ang ngau ngau hian hman nghal vek theih a nih dawn loh thu pawh he hunah hian tarlan a ni bawk a. Police te pawh nasa taka thuamchak an ngaih dawn thu leh Sawrkar Ukil te pawh he Dan thar hmang tur hian an inpeih tawh thu te he hunah hian tarlan a ni bawk.
Nimin-a he hun hmanna ah hian Ser-chhip Police leh zirlaite bakah sawmbik mi thahnem tak an tel a ni.
Comments
Post a Comment