Serchhip-ah Stop Diarrhoea Campaign hawngin naupang kum 5 hnuailam Zinc leh ORS pek an ni dawn
.jpeg)
‘Stop Diarrhoea Campaign’ hawnna hun hi Serchhip Hmar Veng-a Anganwadi Centre No-I ah neih niin Serchhip-a Sr. CMO Dr. LP. Malsawma chuan hmanpuiin thla hnih chhung awh tur he beihpui thlak tur hi a hawng a, hetianga beihpui thlakna hi ‘Intensified Diarrhoea Control Forthnight’ tiin chawlhkar hnih chhung hman thin a nih thu leh kumin ah erawh chuan Stop Diarrhoea Campaign tiin thla hnih (2) chhung, July thla atanga August thla tawp thlenga hman a nih dawn thu a sawi a ni.
He hunah hian Health Department-a Food & Drug Administration (FDA)-a Asst. Director Sarah Laldintluangi chuan kumin a thupui atana thlan ‘Kawthalo ven nan Faina leh ORS a pawimawh’ tih thupui hmanga thu sawiin, naupang in kawthalo an neih chuan ORS leh thil tuiril lam chi a tam thei ang ber pek vat tur a nih thu te, ni 14 chhung Zinc pek tur a nih thu leh kawthalo a reh hnuah pawh ni 14 chhung Zinc hi pek ngei ngei tur a nih thu te sawiin, nausen hnute hne lai te chu eitur leh hnute pek pawh thulh loh tur a nih thu te a sawi a. Tui thianghlim chauh in a pawimawh thu te, nu in nau chaw a siam dawn emaw, a hrai dawn emaw in kut silfai a pawimawh thu te a sawi bawk. Kawthalo-a damlo naupang chuan zual lam a pan zel leh harsatna dang a nei a nih chuan a rang lama Damdawi In emaw, Health Worker emaw pan tur a nih thu bakah he natna chungchanga biakrawn duh nei te tan ASHA te biak tur a nih thu te a sawi bawk/
Nimin-a he hun hman ah hian Deborah Vanlalchuangi, DPM chuan kumin a he beihpui thlak an kalpui dan turte sawiin, Serchhip District chhunga naupang kum 5 hnuailam mi 5155 te chu ASHA ten an In-ah kalchilhin Zinc leh ORS an pek dawn thu leh tun thla ni 31 thlengin he hmalakna hi kalpui a nih dawn thu te a sawi a. Serchhip ICDS Project atangin Block Project Assistant Laldinpuii Ralte pawhin thu a sawi a, he hunah hian Serchhip CMO Office leh ICDS-a thawktute bakah Anganwadi-a kal thin te an tel a ni.
Comments
Post a Comment