Hri len laia Kohhran leh tlawmngai pawl te hmalakna END Minister in Ruihhlo dona ah hmuh leh a duh

Excise & Narcotics Department changtu Minister Lalnghinglova Hmar chuan Covid hripuiin min chimbuai vanglai, sawrkar pawh a chet hleih theih tawh loh laia Kohhran leh Tlawmngai pawl te hmalakna ropui tak ang kha ruihhlo dona kawngah pawh hmu leh thei ila a duh thu a sawi.

Home Minister K. Sapdanga kaihhruaina hnuaiah niminpiah tlai khan Lunglei DC Conference Hall-ah Ruihho Do chungchang ah thutkhawm neiin he hunah hian Excise & Narcotics Department changtu Minister Lalnghinglova Hmar chuan sawrkar hotute, tlawmngai pawl leh Kohhran hruaitute nen a Ruihhlo do Meeting neih a tulna chhan sawiin, “Lunglei District-ah hian engtiangin nge sawrkar hian ruihhlo do hi kalpui se tia Kohhran leh tlawmngai pawl ten beiseina an neih tih sawrkar chuan a hriat duh bakah, an thurawn te pawh ngaihthlak a duh a, chutiang atana Vawiin Meeting hi huaihawt a ni,” a ti a. Sawrkar chuan theitawp chhuahin Ruihhlo hi a do mek zel tih sawiin, Kohhran leh tlawmngai pawl te pawhin Ruihhlo Do kawngah chak taka hma an lak reng thin avangin lawmthu a sawi a, “Ruihlho do hi thapui chhuah tak meuh meuh a kan beih a tul tawh takzet a. Kan hmalakna hrang hrangte kan inhrilhhriat tawn theuh te pawh a tul hle a ni,” a ti a. Ruihhlo hian min chim nasat avangin kil thum- Sawrkar, Tlawmngai Pawl leh Kohhran atanga thapui thawh a kan do ho a tul tawh takzet tih sawiin, Covid hripuiin min chimbuai vanglai, sawrkar pawh a chet hleih theih tawh loh lai a, Kohhran leh tlawmngai pawl te hmalakna ropui tak ang kha ruihhlo dona kawngah pawh hian hmu leh thei ila tia duhthu a lo sam thin thu a sawi bawk.

He thutkhawm ah hian Social Welfare & Tribal Affairs Minister Lalrinpuii chuan Drug Do Policy duan mek a nih thu sawiin, Mizoram-ah sawrkarin ruihhlo dona atan cheng vbc. 3 a sanction thu leh Social Welfare Department in Master Trainer 40 a neih mek thu a sawi a. Nasha Mukt Bharat Abhiyaan , Ministry of Social Justice hnuaiah Awareness leh Training neih nan kumtin sum a lo kal thin thu leh District len dan a zirin sum sem thin a nih dan te sawiin, Mizoram pumah De- Addiction Centre 50 awmin heng te hi; Ministry of Social Justice and Empowerment hnuaia enkawl 10 leh Private enkawl 40 te an nih thu a sawi bawk a ni.

He thutkhawm ah hian Lunglei Sub-Hqrs. YMA hruaitute, Kohhran hrang hrang hruaitute, MHIP, Police, Excise & Narcotics leh District Administration aiawhte telin ruihhlo do kawng an hmalak tawhna leh harsatna an tawh hrang hrang te an tarlang a, sawrkar tha tihchak tur leh puibawm tura an inpeih reng thu sawiin, tanrual a tul zia pawh an tarlang bawk a. Supply Minister B. Lalchhanzova pawh he hunah hian telin thu a sawi bawk a ni.