Serchhip-ah dan kalha naupang chhawrluih an awm leh awm loh enfiah hna thawh a ni
Nimin-a Serchhip khawchhung fangtu District Task Force on Child and Adolescent Labour te hi an Chairman leh District Bawrhsap Paul L. Khuma chuan nimin khan Serchhip DC Office Tual atanga vailiamin Task Force-ah hian Police te leh sawrkar Department hrang hrang Official te bakah tlawmngai pawl hruaitute an tel a. Nimin-a fehchhuak zingah hian Serchhip Sub-Headquarters YMA hruaitute, Police te, I&PR te leh Serchhip District Child Protection Officer leh a thawhpui te an tel a. New Serchhip Area atanga bultanin kawngpui dunga dawr te, thingpui dawr te, Hotel teleh Workshop te an tlawhchhuak a. Heng hmunah te hian naupang kumtling lo hnathawka chhawrluih an awm leh awm loh enfiahin, kum 14 hnuailam hnathawk tura chhawrluih hmuh tur an awm lo a, kum 14 chunglam zingah Dan in a phal ang hna thawk erawh hmuh tur awmin Vawiin hian a tum hnihna atan he hmalakna hi chhunzawm leh a ni ang.
Child and Adolescent Labour (Prohibition and Regulation) 1986 chuan naupang kumtling lote an taksa leh rilru hriselna atana him lo eizawna hmuna hnathawka chhawr a khap a. Naupang kum 14 hnuailam te phei chu an zirna tibuai zawngin eng hna mah thawh phal a ni lo a. Hna reng reng naupang theihna leh zahawmna hlohtirtu emaw; naupang taksa leh rilru hmasawnna leh thanna dal theitu emaw, an zirna tibahlah tirtu emaw, zirna chawlhsan ngai khawpa thawh ngai hna te reng reng khap tlat a ni. Tleirawl te hi zan dar 7:00 atanga zing dar 8:00 inkarah inhlawhfaa chhawr phal a ni lo a. An taksaah danglamna leh hmasawnna la insiammek te an nih avangin an hriselna atana pawi thei tur te, an nunna atana hlauhawm ang chi reng rengah inhlawhfak khap a ni a. Chhawrlui an awm a nih chuan dan anga hrem theih an nih thu Child and Adolescent Labour chungchanga Sensitization Workshop tun thla ni 8-a neih ah tarlan a lo ni tawh a ni.