Serchhip District-ah ASF vanga Vawk thi 24 a awm belh
AH&Vety Department chhinchhiahna atanga a lan danin nimin khan Serchhip District-a Veng leh khua 8-ah Vawk thi 24 a awm a, heng te hi Bak-tawng khua ah 8, Chhiahtlang-ah 4, Thenzawl, East Lungdar leh New Serchhip South-ah pathum theuh leh Serchhip Hmar Veng, Vengchung leh Field Veng-ah pakhat theuh te an ni. Nimin vek khan Veng leh khua 9-ah Vawk 95 zet suat a ni leh bawk a, Baktawng leh Chhuanthar Tlangnuam-ah 26 ve ve suat niin New Serchhip South-ah 12 suat a ni bawk. Heti hian nimin thleng khan Serchhip District-ah ASF vanga Vawk thi 1163 a awm ta a, Vawk 3056 suat ni tawh bawk.
Hetihlai hian Serchhip District chhunga Lungchhuan khuaa Vawk thi te chu African Swine Fever (ASF) vanga thi an ni tih finfiah a nih leh tak avangin The Prevention & Control of Infectious and Contagious Disease in Animal Act 2009, Section 3 (b) in thuneihna a pek angin Serchhip DVO H. Vanlalrawna chuan Lungchhuan khua hi July 10, 2024 atangin Vawk hri lenna hmun, Infected Area-ah a puang ve leh a, Lungchhuan khawchhung atang hian Vawk, Vawksa leh Vawksa atanga thil siam reng reng lakchhuah khap tlat niin Vawk talh leh Vawksa zawrh khap tlat a ni bawk. Serchhip District-a ASF vanga harsatna thlenna Khua leh Veng 26 zingah khaw 11 te chu hri lenna hmun ah hian puan a ni tawh a ni.