Hmarchhak hmasawnna chu sawrkar laipui ngaih pawimawh ber a ni - MoS for Minority Affairs

Zonuna Kawlni (LENKAWL) • July 12, 2024 • Comments • Mizoram

Union Minister of State for Minority Affairs, George Kurian chuan hmarchhak hmasawnna chu sawrkar laipui ngaih pawimawh ber a nih thu a sawi a. Mizoram-a ASF hri leng mek chungchangah Vawk te chu suat an nih hmaa sawrkar an hrilh ngei a nih chuan zangnadawmna an dawn tur thu a sawi bawk. 

Union Minister of State for Minority Affairs, George Kurian hian Mizoram rawn tlawhin nimin khan Aizawl-a BJP Office-a Extended State Executive Meeting neih chu a hmanpui a, BJP chu Development party a nih thu sawiin, “Development duh zawng chu BJP ah lo inpe vek turin ka sawm che u. Ka Ministry hnuaiah Scheme hrang hrang awmte chu kan duh a nih chuan theihtawp chhuahin ka lo tanpui dawn che u. Prime Minister Pu Modi hian Community tinte ang khat vekin min en,” tiin India mipui huapin Development an kalpui mek thu a sawi. George Kurian chuan kum 1980-ah BJP-ah a inpe tih sawiin, “Kan khuaah 95% hi Kristian kan ni a, tuman mak min ti lova, BJP chu Anti-Christian a ni an ti ve ngai lo. Chuvangin BJP hi Anti-Christian kan ni lo. Politics a inbeihna mai a ni tih hi kan hriat a ngai. BJP inghahna thurin chu Integral Humanism a ni. Hmasawnna tluantling kan neih theih nan nangni pawh tawngtai nun lo nei ula, BJP hian Mizoram-ah hmasawnna dik a thlen ve ngei ka beisei tlat a ni,” a ti.

Nimin vek khan Aizawl-a BJP Mizoram State Press Conference Room-ah thuthar thehdarhtute kawmin George Kurian chuan hmar-chhak hmasawnna chu sawrkar laipui ngaih pawimawh ber a nih thu leh hmarchhak State-a hnam tlêm zawkte tan PMJVK hnuaiah  hmasawnna ruhrel din hna thawh mek a nih thu a sawi a. Manav Sampada programme pawh Prime Minister Narendra Modi-a kaihhruaina hnuaiah tan a nih tawh thu a sawi bawk.

Union Minister hian ASF chungchang pawh sawiin, ASF laka inven dan leh Zangna-dawmna a awm thu pawh sawiin, a tuartute chu sawrkarah an zualko a ngai a; Sawrkar hnena report hmasa lova an lo suat thin avangin buaina a awm thin a, hmalak a harsa thin, a ti a. Vawk te chu suat an nih hmaa sawrkar an hrilh a nih chuan zangnadawmna an dawn tur thu a sawi bawk.