Remna Thuthlung Ziah lawmna hun hman a ni

Mizoram Remna Thuthlung Ziah (Signing of Mizoram Peace Accord) hriatrengna hun leh lawmna hun chu Zirtawpni zan khan RB McCabe Hall, Aijal Club-ah neih a ni a, Governor Dr. Hari Babu Kambhampati chuan he hun hi a hmanpui a ni.

Aijal Club-in Mizoram Remna Thuthlung Ziah; (Signing of Mizoram Peace Accord) hriatrengna hun leh lawmna an buatsaih ah hian Governor chuan State puma mipui zawng zawngte duhsakna chibai bukin, he ni pawimawh tak hian Remna leh muanna, inpumkhatna leh hmasawnna kawnga ke pen kan duhna a ti chiang tih a sawi a. “Remna Thuthlung ziah Ni hi kan ram ropui tak chanchin ziahnaah hmun pawimawh a chang reng tawh a ni,” a ti. Remna a awm theihna tur leh Mizoram tana hmalam hun êng zawk siam tura remna kawnga thawktu zawng zawngte chungah Governor chuan lawmthu a sawi a. Mizoram Peace Accord chu kan State tana beiseina eng leh midangte tan pawh khawnvar anga chiang taka hmuh theih beiseina eng leh entawn tur, Remna Thuthlung hlawhtling tluantling awm tlem te zing a mi a ni, a ti bawk. 

He hunah hian Chief Minister Lalduhoma pawhin Remna leh Muanna a lo awm theihna atana theihtawp lo chhuahtu te inpekna chu a ropui a tih thu a sawi a. Mipuite tawngtaina Pathian in a chhang a, remna kan neih theih bakah he remna hi a tluantlinga kan vannei hle a ni, a ti. Kan hun tawn atang khan kan inzir fin a pawimawh tih pawh Chief Minsiter chuan sawiin, tunah chuan remna leh muanna duhtu kan nih angin India khua leh tui rinawm tak nih kan tum a pawimawh a. India ram hi khawvelah Minority te tana zawl dawh ber leh minority te ngaihven ber ram a ni a kan vannei tih a sawi a. Remna leh Muanna chuan rah tha a chhuah thin a; hmasawnna leh changkanna te pawh nei tur chuan remna leh muanna hi nghet taka kan vawn tlat a ngai a ni, a ti bawk.

Mizoram Peace Accord, 1986 hi India sawrkar leh Mizo National Front (MNF)-te kara Inremna Thuthlung, kum 1966 atanga intan Mizoram a helna tihtawpna a ni a. He Document hming hi ‘Mizoram Accord, 1986: Memorandum of Settlement’ tih niin June 30, 1986 khan MNF President Laldenga; Union Home Secretary RD. Pradhan leh Mizoram sawrkar-a Chief Secretary Lalkhama ten hming an ziah hnan a ni.

Signing of Mizoram Peace Accord hriatrengna hun leh lawmna hun hi Chief Secretary leh The Aijal Club-a President Dr. Renu Sharma chuan kaihruaiin inlawmna thu a sawi a, ‘Mizoram Circa 1960 to 1990’ tih video chu thlirho niin Governor hian Chief Minister hlui Laldenga (L), Brig. T. Sailo (L), CH. Chhunga (L), Lal Thanhawla, Zoramthanga leh Chief Minister Lalduhoma bakah Chief Secretary hlui Lalkhama te hnenah chawimawina thlilpek a hlan bawk a ni.