Deputy Speaker in kawng siam mek a tlawh

Assembly Deputy Speaker Lalfamkima chuan Inrinni khan Kolasib District chhunga NH-54/6 RTP Farm leh Sethawn inkar leh Kawnpui Quarry bula kawng siam mek a tlawh a, Contractor chu chak zawka hna thawk turin a hrilh.

National Highway 54/6 huamchhung, Kolasib leh Kawnpui inkara RTP Farm leh Sethawn khaw inkar leh Kawnpui Quarry bula kawng chhe zual lai, ruah a sur changa lirthei tànna thin hi NHIDCL hnuaiah Contractor, C. Lalhluna, Aizawl chuan a thawk mek a, helai hnathawktu Contractor hian nikum October thla khan Work Order hmuin hnathawh hun chhung tura ruat thla 6 a zawh hnuah tunah hian hun pek belh a ni a, Estimate Amount hi cheng vbc. 3 a ni.

Assembly Deputy Speaker chuan Mizoram sawrkarin inkalpawhna kawngpui a ngaih pawimawh thu sawiin, Mizorama kawngpui pawimawh leh lun ber NH-54/6, Aizawl panna kawngah hun rei tak chhung lirthei kal velah harsatna a awm thin chu pawi a tih thu sawiin, hna enkawltu NHIDCL leh Contractor te chu mipuite mamawhna hriaa an hna uluk leh chak taka thawk tura chahin, huntiam chhunga thawk zo ngei turin a chah bawk.