Vairengte chhehvel-a Kudam hrang hrang enfiah a ni

Tunhnai khan Vairengte leh a chhehvela Kudam 20 atangin Dan lova ramdang atanga lakluh nia hriat Kuhva ro bag 9635 zet man a ni a, heng kuhva te hi khawih chet theih loh tura hren nghal a ni.

Home Department hotute sawi danin Kuhva chingtu pawl hrang hrangte ngenna bawhzuiin Mizoram sawrkar chuan kar kalta chhung khan Dan lova Myanmar atanga tawlh Kuhva dap beihpui thlakin Kolasib District chhunga Kudam 71 chu Magistrate ten Police hruaiin an dap a, Vairengte leh Bilkhawthlir-a Kuhva chingtu Society hruaitu ten an tawiawm a ni. He hunah hian Vairengte chhehvela Kudam 66 leh Buh-changphai chhehvel-a Kudam 5 enfiah niin Kudam 20 chhungah Myanmar Kuhva ro nia hriat bag 9635 hmuhchhuah a ni a, Kudam dang 51 erawh chu a ruak a ni. Heng Kuhva te hi khawihchet theih loh tura hren nghal a ni a, a neitu nia hriat te chu zawnchhuah mek niin report kimchang sawrkar a thehluh a nih hnuah kalpui zel dan tur thutlukna siam tura dah a ni.

Home Department hotute chuan Myan-mar atanga Dan lova kuhva lo lut tur hi Champhai District-ah pawh khauh zawka ven nghal a nih thu an sawi a, Champhai Police te chuan Police Check Gate hel rukna kawng sial atangin tunhnai khan Kuhva hi Truck pathum atangin bag 190 an man thu leh heng kawng ruk sial te pawh hi ven nghal a nih thu an sawi a. Hei bakah hian Mizoram chhung hmun hrang hrangah dan lova ramdang atanga Kuhva tawlhruk vengin Police te leh Kuhva chingtute chu chhun zan zawmin an Duty bawk a ni.

Kuhva chingtu Society hruaitute pawhin ramdang Kuhva lo lut avanga harsatna hian a vawr-tawp a thlen tawh avangin ramdang Kuhva tawlh thin te chu an thil tih bansan turin an ngen a, an ngenna ngai pawimawh lova man an awm a nih chuan a hmunah chinfel nghal zel a nih tur thu an sawi a ni.