RD Minister in MzSRLM SHG member te a kawm

Rural Development Department changtu Minister Prof. Lalnilawma chuan MzSRLM hnuaia SHG member te chu niminpiah khan biakhmuh theihna kaltlangin a kawm.

He inkawmna ah hian Mizoram-a RD Block 28-a SHG Member te telin SHG member hrang hrangte atangin MzSRLM kaltlanga an hamthatna hmuh te leh hma an sawnna te ngaihthlak niin hemi bakah hian SHG Member te atanga zawhna awm te chu Minister hian a chhang bawk a ni. Self Help Group tihchangtlun zel dan tur leh nasa lehzuala SHG member-ten hma an lak zel theih dan tur sawiho a ni bawk. He hunah hian Minister hi Rural Development Commissioner & Secretary R. Zarzosanga leh H. Lalchhandami, Chief Executive Officer, MzSRLM ten tawiawmin District Headquarters leh Block Headquarters atangin Project Directors leh BDO ten an telpui bawk a ni.

Mizoram State Rural Livelihoods Mission (MzSRLM) hnuaiah hian Mizoram-a District 11 leh RD Block 28-ah hmalakna nei mekin, an hnuaiah hian Self Help Group 10,425 din a ni tawh a, member 81,829 an awm mek a, SHG member te hi eizawnna ngelnghet an neih theihna turin kawng hrang hranga puih niin Community Funds an puk tur pek an nih bakah an eizawnna atana an mamawh training hrang hrang pek thin an ni bawk.