‘Hripui leng kâra hmangaihna’ Lehkhabu tlangzarh
The Writer's Club leh Laisuih Zirbing Rûn tangdunin COVID-19 hri len laia Thawnthu tawi inziahsiak an buatsaiha a thazual 20 dah khawmna lehkhabu, ‘Hripui leng kâra hmangaihna’ tih chu nimin khan MJA President C. Lalrambuatsaiha'n Emerald Hotel Conference Hall, Aizawl-ah a tlângzarh.
Lehkhabu tlangzarh pah-a thu a sawina ah MJA President chuan, mihringte hi Pathian in hun inang tlâng vek a pe tih sawiin, an hman tangkai dân erawh a inang lo hle tih a sawi a. Tuna lehkhabu an tlângzarh tâk pawh hi COVID-19 hri len lai, hnathawh theih loh laia hunawl tangkai taka hmangtute vanga lo chhuak a nih avangin a hlu hle a ni, a ti a. Thu tha leh ril tak tak pawh ziaka dah a nih loh chuan a hlutna a lang chhuak lo fo a, ziaka dah a nih chuan a chhawrtu tam tak an awm thin avangin ziak ngeia dah chu an intihhmuh zêl a tul a. Hetih rual hian, Mizoram-ah ziak miten an kut hah man hlawkna an tel tam tawk lo hle tih sawiin, khawvel hmun dangah chuan lehkhabu pakhat lek pawh an hausakpui a, hetiang hi la tawng pha ve lo mah se, ziak ngeia dah chu intihhmuh zêl a tul tih a sawi.He hun hi The Writer's Club President Lalhmachhuana Zofa chuan kaihruaiin Thawnthu tawi inziahsiakna ah hian VL. Muanpuia chu pakhatna niin Hmingtea Tlau chu pahnihna leh F. Lalthazuali chu pathumna an ni a, mi 5 hnenah Consolation Prize hlan an ni bawk.
Comments
Post a Comment