PUC in zirlai titha chawimawi

Pachhunga University College (PUC) chuan nimin khan PUC Multipurpose Auditorium-ah zirlai titha chawimawina leh kal tharte lawmna hun hmangin Higher & Technical Education Minister Dr. Vanlalthlana chuan khuallian niin nia a hmanpui bakah Jeje Lalpekhlua MLA chu khual zahawm a ni bawk.

PUC Felicitation & Freshers’ Social-ah hian H&TE Minister chuan zirlaite chu tih tak takna leh dawhtheihna nena zir tura chahin, anmahni pawh khawvel hmasawn dan ang zela intuaihriam reng turin a chah a, Company lian leh ropui tak tak te pawh khawvel hmasawnna in a kentel anga an in update duh ve loh avangin an tlachhe tawh tih sawiin, “Hetiang chiah hian keini pawh khawvel hmasawnna mil zelin a tha lamah kan in update ve zel a pawimawh,” a ti bawk.

Kumin hian PUC atangin UG Stream hrang hrangah mi 960 in Final Semester Examination an hmachhawn a, chung zinga zirlai 830 chu pass in, pass percentage hi 86.46 a ni a. Arts Subject hrang hrang atangin Top 10 Rank nei mi 67 an awm a, Science Stream atangin Top 10 Rank nei mi 68 awm bawkin Commerce atangin mi 5 leh Management atangin mi 10 an awm a. MZU Under Graduate Exam-2024 ah PUC atangin Rank nei zawng zawng zat hi mi 150 an ni a. MZU hnuai Rank Holder awm zawng zawng mi 227 atangin PUC atanga rank holder mi 150 te hian za zela 66 an hauh phak a ni.

PUC-ah hian tun dinhmunah UG Course hrang hrang 23 leh PG Course 5 zir theih a ni a, zirlai zawng zawng hi mi 2600 chuang an ni tawh bawk a. Nimin-a hun hman ah hian Department tina Top 10 ni pha te chu chawimawina Certificate leh pawisafai hlan niin Stream hrang hranga titha berte hnenah ‘Proficiency Award’ hlan an ni a. Kum 2023-2024 chhunga PUC zirlai tha ber, ‘Student of the Year’ atan Lalnunpuii Hlawndo, Dept. of Economics chu thlan a ni bawk.