MPCC in General Consent pe tha leh turin Chief Minister hnenah ngenna an thehlut

Mizoram Pradesh Congress Committee (MPCC) chuan ZPM sawrkarin CBI hnena General Consent a pek tunhnaia a hnuhkir leh chungchang ah Chief Minister hnenah ngenna thehlutin inthlan hmaa an intiam ang ngei a General Consent pe tha leha an ngen thu leh an phut thu an sawi.

Nimin a Aizawl Press Club-a thuthar thehdarhtute an kawmna ah MPCC Vigilance Cell chuan tuna Chief Minister hian Mizorama corruption a nasat thu leh chumi dona tura CBI an kohluh tur thu mipuite hmaah vawi duai lo a lo sawi tawh thu sawiin, nikum December 14-a Assembly House-a Governor thusawi sawihona ah pawh General Consent an pek thu thu hi a sawi niin an sawi a. Hemi bawhzuina ni ngei tur hian nikum Dec. 28 khan Gazette Notification tichhuakin CBI-in Mizoram chhunga investigation an tih theih nan phalna (general consent) chu pek a nih tak thu leh he Notification, Section 6 of the Delhi Special Police Establishment Act, 1946 behchhana chhuahah hian Central leh State sawrkar hnathawkte thliar lovin chhui phalna (general consent) pek a nih thu an sawi a ni.

MPCC hruaitute chuan CBI Director lehkha June 20, 2024-a tihchhuah chhuanlama hmangin State hrang hrang Chief Secretary-te hnena Generic Draft Consent Notification a rawn thawn chu a ngai ngai a hmangin, Gazette Notification thar, July 1, 2024-ah tihchhuah a ni leh tak thu leh December 28, 2023 a Notification chu awmze nei lovah an rawn siam leh ta si niin an sawi a. CBI hian State chhungah thuneihna nei lo mahse, Section 6 of the Delhi Special Police Establishment Act, 1946 hnuaiah State Sawrkar-in thuneihna a pe thei tih sawiin, tuna Central sawrkar hnuaia thawkte chauh chhui thei tura CBI hnena Consent pek hian Mizoram mipuite tuihalna a tih reh loh thu leh ZPM-in inthlan hma a an thutiam pawh a ti hlawhtling lo niin an sawi a. “Chuvangin Gazette Notification thar chhuah a, Central Sawrkar hnuaia thawk public servant te bakah Mizoram Lokayukta in rawtna a siam a nih phawt chuan Mizoram Sawrkar hnuaia thawk public servant te, Mizoram sawrkar phalna a hranpa a lak kher ngai lova chhui thei tura CBI hnena General Consent pekna Gazette Notification chhuah turin kan phutin kan ngen,” an ti a ni.