Mizoram-a Green-Ag cum Green Landscape Information Platform (GLIP) hmalakna thlirho a ni

Nimin khan Agriculture Minister PC. Vanlalruata hovin a Pisa-ah Global Environment Facility kaltlanga Green-Ag cum Green Landscape Information Platform (GLIP) hnuai a hmalakna en ho a ni.

Agriculture Department changtu Addl. Secretary Lalnunhlua kaihhruai he hunah hian Agriculture Minister PC. Vanlalruata chuan Green-Ag kaltlanga Mizoram chhung a ramngaw kan neih te humhalh chunga kuthnathawktute tana eizawnna ngelnghet siam tura hmalakna kalpui a ni chu lawmawm a tih thu sawiin, Green-Ag kalpuina State hrang hrang zingah hmahruaitu nih tum zel turin thawktute a chah a. Kuthnathawktute tihmasawn tura thawktu an ni tih hre reng turin leh neitu nihna thinlungpu chunga rinawm taka hna thawk turin a fuih bawk a ni. Minister chuan Green-Ag cum GLIP chu ei leh bar a kan intodelhna kawng a hmanraw pawimawh tak a nih a beisei thu sawiin, a thil tum te hlawhtling taka kalpui zel a nih theih nan uluk zawkin Agriculture Department-a thawktuten an vilpui zel tur thu a sawi bawk a ni.

He hunah hian Agriculture Department Addl. Director R. Lalnunzira chuan Mizoram-a Green-Ag thiltum te tihlawhtling tur chuan inpekna leh neitu nihna thinlungpu chung a thawktuten hna an thawh a pawimawh thu a sawi a. Kuthnathawktute harsatna leh mamawh zirchiang a, an mamawh mil a ruahmanna siam leh chung ruahmanna te tih hlawhtlin ngei a nih theih nana bawhzui chak turin thawktute a fuih a ni.

Report a tarlan danin Green-Ag hi Sustainable Development Goals leh Food & Agriculture Organisation thil tum thenkhat tihlawhtling tur a hmalakna pawimawh tak a ni a. Mizoram-ah hian Lunglei leh Mamit District-a khaw 38-ah hmalakna kalpui mek niin kum 2027 thleng awh tura ruahman a ni. Kuthnathawktuten ramngaw tichereu lo zawnga eizawnna ngelnghet an neih theih nan ruahmanna hrang hrang siam niin Farmer Field School kaltlangin loneitute leh ranvulhtute hnenah zirtirna te pek thin a ni a. Village Implementation Committee din niin khaw hrang hrangin an mamawh mil zel a ruahmanna siamin hmalakna kalpui thin a nih thu tarlan a ni.

Nimin-a he hun hman ah hian Dr. Kenny Vanlalhriatpuia, State Technical Coordinator, Green-Ag chuan Green-Ag hnuai a ruahmanna hrang hrang sawiin, Lalchhuanawmi Pachuau, Team Leader, Green – Ag chuan hmalakna kalpui tawh dan report a pek bakah T. Lalramdinmawii, Budget & Finance Officer, Green-Ag chuan sum dinhmun report a pe a. He hunah hian Lunglei leh Mamit District chhunga khaw 38-a hnathawhna tur hmanrua chi hrang hrang semchhuah nghal a ni bawk.