Pu Buanga lehkha leh sulhnu pawimawhte hlan

INTACH Mizoram Chapter chuan Pu Buanga (JH. Lorrain) lehkha leh sulhnu pawimawh te chu bu pali (4)-ah siamin, Mizoram Sawrkar leh Kohhran leh Zirna In Archive/Library a dah turin nimin khan an hlan.

Art & Culture Minister C. Lalsawivunga Pisa-a lehkhabu hlanna puala hun hman ah Art & Culture Minister chuan Mizo history leh ziarang (culture) zirchianna leh humhalh kawnga INTACH Mizoram Chapter te, ziak mite leh pawl dang dangin hma an lo lak tawhna chu fakawm a tih thu a sawi a. INTACH Mizoram Chapter te hmalaknaa lehkhabu an hlan chu a hlut thu sawiin, mi tam takin an tangkaipui ngei a beisei thu a sawi bawk.

INTACH Mizoram Chapter hian Mizo ram leh hnam ro, thil hlu leh pawimawh - khawih theih leh theih loh te, hmuh theih leh hmuh theihloh chenin zawnchhuah a, vawnghim turin kum 1984 atang khan hma an lo la tawh a. An hmalakna pakhat atan ‘Pu Buanga Dictionary’ an tih mai, Dictionary of the Lushai Language by James Herbert Lorrain (1940)-a a kimlo lai zawngin Pu Buanga sulhnu chu Angus Library & Archives, Regent Park College, Oxford University, United Kingdom-ah a awm thu hriat a ni a. Pu Buanga Dictionary-a kim lo tak chu a lo awm lova. Mahse Pu Buanga sulhnu thil tam tak leh thildang engemaw zat, la hmuh ngai loh chu haichhuah a ni ta a. Hengte hi Bu 4-ah siamin chungte chu (i) Pu Buanga lehkhathawn leh a lehkha dawn thenkhatte; (ii) Pu Buanga kut hnu thenkhat, Dictionary chungchang leh thil dangte, (iii) Whilom Head Hunters (iv) Darphawka Mumang - Ziaktu: C Chama, Theiriat te a ni.