Mizoram Lokayukta kut phuar sut turin CM ngen

Congress Party chuan ZPM sawrkar chu Mizoram Lokayukta kut phuarah puhin, an kut phuar sut turin Chief Minister an ngen.

MPCC Vigilance Cell chuan he ngenna hi nimin khan Chief Minister Office-ah thehlutin hemi chungchangah hian Aizawl-a thuthar thehdarhtute an kawm nghal a, he hunah hian MPCC Sr. Vice President Lalnunmawia Chuaungo chuan Mizoram Lokayukta Act 2014 passed a nih a, kum 2019 atanga Mizo-ram hnathawhtir anih atangin State chhunga corruption chungchanga case chhui thei awmchhun a ni, a ti a. Mizoram Lokayukta Act-ah pawh Case Investigation chhui mek, Court la thleng lo chu Mizoram Lokayukta-ah transfer vek tur tih niin corruption hlemhletna chungchang ah a pawi-mawh em em a ni, a ti.

Hetihlai hian ZPM chuan kumin March ni 15-a Gazette notification a tihchhuahah Lokayukta dan siamthatna siamin Lokayukta hnathawk chak thei tura siam aiin Lokayukta hnathawk hleitheilo tura siamna tura thil tihdanglam thahnem tak an nei niin a sawi a. Lokayukta chu an thuam chak ang an ti ve tak na a, an hmalak dan chu a letling ta hlauh mai nia sawiin, “Lokayukta chu a kut phuarin a hnung an khirh ta zawk a ni,” a ti.

Congress Party hian Chief Minister hnena lehkha an thehluh ah hian Dan siamthat ngai nia an hriat hrang hrang tarlangin, Mizoram Lok-ayukta hian sawrkara in nghat lova zalen tak leh hleih nei lova hna a thawh theih nan a mamawh ang Officer leh staff pe vat tur leh kum 2021-a State sawrkarin ACB atanga post 25 Mizoram Lok-ayukta-a transfer tura thutlukna a lo siam tawh chu a taka chantir nghal turin an phut tih Congress Party chuan an sawi bawk a, Lokayukta hnuaia Officer leh Staff-te la tura Mizoram Lokayukta nena thuneihna pe tura an phut thu pawh tarlangin, hei hi Mizoram Lokayukta Act siamthat ruala awlsam taka tih theih a ni tih an tarlang tel bawk a ni.