NH-54 kawngpui laihzauh mek-a In leh bungrua la senghawi lo te a hmunah enfiah leh a ni

National Highway-54 laihzauh leh siamthat hna thawh mekah Chhiahtlang khaw chhunga kawng siam hna thawh meka harsatna la awm te chu nimin khan a hmunah enfiah leh niin harsatna siam lova hnathawktute lo tawiawm tura hriattir an ni.

Serchhip District chhunga National Highway-54 laihzauh leh siamthat hna thawh mekah hian Chhiahtlang khaw chhungah hian zangnadawmna la tawh chunga In la thiat lo mi pakhat awmin Road Reserved Area chhunga In leh bungrua la nei mi thenkhat an awm bawk a, heng mite dinhmun enfiah tur leh In leh bungrua te a theih ang anga senghawi tur hian nimin khan Serchhip DC Office atanga Executive Magistrate hovin NHIDCL leh kawng siam hna thawktute bakah Police te chu an thawkchhuak a. Zangnadawmna la tawh chunga In la thiat lo pakhat hian harsatna an tawh thu Serchhip District Bawrhsap hnenah thlenin Court-ah an kal mek thu leh nimin khan an chungchang hi ngaihtuah a ni dawn tih an hrilh avangin In thiah sak tur hi ti khawtlaiin chawlhkar khat chhunga an In te hi lo thiat tura tih an ni a, Court in In thiah tur hi a tikhawtlai a nih loh chuan hemi hnu hian thiah sak tur a ni bawk ang.

Hemi hnu hian Chhiahtlang South VC Area huamchhunga Kawngpui laihzauh kawnga harsatna la awm te chu enfiah chhunzawm nghal niin heng te hi a tlangpuiin an In hmun leh Pass an neih pawn lam-a ram enkawl te an ni a, heng mite hian zangnadawmna an hmuh ve theihna turin hma lak sak an nih tawh thin thu hriattir niin, amaherawh chu kawngpui atana Reserved chin huamchhung leh an pass neih pawnlam-a bungrua leh thildang dah an nih avangin zangnadawmna pek theih an nih loh dan te hrilhfiah an ni.

Hei vang hian Chhiahtlang South VC huam-chhunga mi 9 te chu kawngpui laih leh siam hna thawh mekah hnathawktute tan harsatna lo siam sak lo tura hriattir niin kawngpui atana ram lak tur chin hi teh fel nghal a ni a, Fur ruahtui a ziaawm veleh kawng zauhna tur laih hna hi thawh tan a nih dawn thu hriattir nghal an ni bawk.