LESDE Department enkawlna hnuaiah dah thar

Mizo thalai, ram pawna hnathawka tirchhuak thin te zawm tur Dan Home Department in an kenkawh thin ‘The Mizoram Placement Agencies Act 2015’ chu Labour, Employment, Skill Development and Entrepreneurship (LESDE) hnuaiah dah thar a ni.

He thu hi LESDE Minister Lalnghinglova Hmar chuan sawiin, Chief Minister Lalduhoma kaihhruai Council of Minister thutkhawm hnuhnung berah he thu hi an pawm a; a enkawltu inthlakna tur rawtna hi GAD atanga lut a nih thu leh Mizo thalai ram pawna hnathawka tirchhuak thin te zawm tur Dan hi a nih dan tur ang taka kenkawh a ni dawn tih a sawi a, dik taka hmang turin Department-in theihtawp a chhuah dawn tih a sawi bawk.

Dubai-a Mizo hmeichhiate harsatna tawh chungchanga Congress thalai hruaitute nen an inkawmna ah Chief Minister hian April ni 29 khan ram pawna Mizo thalaite thawnchhuak thin Private Placement Agency 27 te chu an licence cancel-sak an ni dawn tih a lo sawi tawh thu Minister chuan sawiin, Dan hman mek chu a rang thei ang bera siamthat a ngaih thu leh ram pawna hnathawk tur thawnchhuak tur chuan Immigration Act, 1983 hnuaia Protector of Immigrant hnuaiah license an dil tur a ni tih a sawi a. Hei hi Ministry of Overseas India Affairs hnuaia awm niin hemi hnuaia License nei thlap te chuan harsatna an tawk ngai lo tih a sawi bawk.