ASF hri leng a hluar zel

Serchhip District-ah ASF hri leng in ziaawm lam ala pan thei rih lo niin a lang a, ASF hri lenna pawh hi a zau tial tial niin a lang.
Serchhip-a AH & Vety Department chhinchhiahna atanga a lan danin nimin thleng khan Serchhip District chhunga Veng leh khua 22 zet-ah ASF hri hi a darh tawh niin a lang a, nimin bika-ah Khua leh Veng 10-ah Vawk thi awm belh lehin Thenzawl-ah 32, Kei-tum-ah 26, North Vanlaiphai-ah 6, East Lungdar-ah 4, Baktawng-ah 3 leh Khumtung-ah pakhat te an thi leh a, heng bakah hian Serchhip khawpui chhungah Field Veng-ah 3, Kawnpui South-ah 2 leh Kawnpui North leh New Serchhip South-ah pakhat ve ve te an thi a, nimin-a Serchhip District a vawk thi hi 79 zet a ni.

Nimin vek khan Serchhip District-a khua leh Veng 9-ah Vawk 86 suat leh a ni bawk a, Vawk suat tam berna Keitum-ah 28 suat niin Chhuan-thar Tlangnuam-ah 21, North Vanlaiphai-ah 17, East Lungdar-ah 7, Chhingchhip-ah 5, Chhiahtlang-ah 4, Piler-ah 2 leh Baktawng leh Serchhip Field Veng-ah pakhat ve ve suat a ni a. Heti hian nimin thleng khan Serchhip District-a ASF vanga Vawk thi chu 803 tling tawhin Vawk 2452 suat a ni tawh bawk a ni.

ASF hri leng hi Serchhip Town chhung bikah pawh a hluar zel niin a lang a, Chhiahtlang khua ah Vawk thi a awm tawh bakah New Ser-chhip North leh South VC Area-ah pawh Vawk thi a awm tawh bawk a, Serchhip Hmar Veng, P&E Veng, Vengchung, Chanmari, Field Veng, Kawnpui North leh Chhim Veng-ah te Vawk thi awm tawhin heng Veng hrang hranga Vawk te hi RAgT hmanga enfiah ah ASF hri kai nia rinhlelh an ni a, finfiah leh tur a ni ang.

Serchhip khawpui chhungah ASF hri a hluar zel nia a lan avang hian Serchhip Bazar-ah pawh Vawk sa zawrh a awm ta meuh lo a, Dan naran in Serchhip Bazar-ah hian nitin Vawk 4/5 vel talh ni thin mah se tunhnaiah Vawk sa zuar hi an awm mumal ta rih lo a ni.

Comments

Popular News (Last 30 Days)

Serchhip DCSO sawn a ni