MSPMC in ZMC leh Kelsih-a hnathawh an enfiah

Mizoram State Project Monitoring Committee (MSPMC) Team ‘B’ te chuan Zoram Medical College (ZMC), Falkawn-a 82 Bedded Girls Residential Hostel leh 60 Bedded Intern Hostel sak hna kal mek chu Zirtawpni khan a hmunah kalin an enfiah.

Heng Hostel pahnih te hi cheng vbc. 10 seng ve ve a sak niin hnathawh tur za zela 94 thawh a ni tawh a, MSPMC Team hian heng Residential Hostel te hi Plan anga sak a ni em tih uluk takin an endik a. Siamthat ngai leh hmalakna tur point hrang hrangte chu Department hotute leh Contractor-te nen ZMC Committee Room-ah an sawiho a ni.

Hemi hnu hian MSPMC Team te hian ‘Ropuiliani Freedom Fighter Museum, Kelsih’ sak hna kal mek chu an endik leh bawk a. MSPMC hian kumin May 8 khan he hna thawh mek hi uluk leh chik takin an lo endik tawh a, a hna tha lo lai te siamthat dan tur rawtna hrang hrangte MSPMC General Body Meeting May 10-a neih ah an lo rel tawh bawk a. Hemi hnu hian Nodal Department, Social Welfare & Tribal Affairs Department leh Contractor te hnenah rawtna engemaw zat an thlen leh tawh a. Heng rawtna an thlen tawhte leh hmalakna tur an lo ruahman tawh anga bawhzui a ni em tih MSPMC Team te hian an endik a ni. MSPMC hian Ropuiliani Freedom Fighter Museum hi ruahman ang taka a puitlin a, tangkai taka chhawr anih theih nan vil chhunzawm zel an tum a ni.

Heng hnathawh enfiahtu Mizoram State Project Monitoring Committee Team te hi Vice Chairman R. Lal Rinawma, IRS (Rtd.) chuan ho in Secretary Er. Lalthanzuala bakah Member thenkhat te an kal bawk a. Heng hnathawh an enfiahna ah hian Department hotute leh Contractor ten an lo dawngsawng bawk a ni.