Kumin ah ruahtui tla tam

Kumin January atanga June thla thleng khan Mizoram-a ruahtui tla zat chu chawhrualin nikum aiin 100mm in a tla tam zawk.

Indian Meteorological Department in a chhinchhiah danin Mizoram-ah kumin January atanga June thla thlenga ruahtui tla zat chu chawhrualin 619.76mm a ni a, Nikum hemi hun chhung vek khan ruahtui tla zat chawhrual chu 599.40mm a ni a, nikum nena khaikhinin kumin hian 100mm in ruahtui a tla tam zawk a ni. Mizoram District hrang hrang zingah Champhai District in ruahtui dawng tlem berin kumin hian 184.40 mm a dawng a, nikum khan 439.70 mm a dawng thung a. Kolasib District in ruahtui dawng hnem ber in July thla thleng khan chawhrualin 1111.80 mm a dawng a, nikum ah erawh 684.30 mm a tla thung a ni. Kumin bikah ruahtui tlak tam ber ni chu May 28 kha a ni.

State Meteorological Centre, Directorate of Science & Technology-in a chhinchhiah tawh chinah, Mizoram-ah kum 36 (1986 atanga 2021) chhung khan Fur lai (June - September) in kumtin ruah mm 1,289.9 sur ang a ni a. Kum 2017 kha Fur chhung bika ruahtui tlak tam ber kum niin June - September thla chhungin mm 1,836.0 a tla a. Kum 2020 kha Fur chhung bika ruahtui tlak tlem ber kum niin June - September thla chhungin mm 856.4 chauh ruah a tla a ni.