Zakapa Fanai nun behchanna siam Film tlangzarh

Mizo lal huaisen Zakapa Fanai nun behchanna docu drama film siam chu nimin khan Social Welfare & Tribal Affairs, Women and Child Development enkawltu Minister Lalrinpuii chuan a tlangzarh.

Vaivakawn Cultural Centre Auditorium-a Zakapa Fanai nun behchanna siam Docu Drama Film tlangzarhna hunah hian Minister Lalrinpuii chuan Mizo Lal huaisen leh ropui, a khua leh tui leh Mizo hmeichhia te zahawmna leh dikna humhimtu chanchin, Documentary Film a buatsaih a ni chu lawmawm a tih thu sawiin, Mizo ten hnam hmangaihna lama min thanharh tir lehtu atan leh midangte tana malsawmna lo ni thei se a duh thu a sawi a. “Vawiin hi Mizo te hnam anga kan lo than chhohna-ah leh khawvel hriata chhinchhiah kan lo nihna kawngah bung thar kan kai a tih theih awm e,” tiin Mizo Lal ropui Zakapa chanchin atangin Mizo khawtlang nunah leh ram leh hnam hmathlir kan neihna-ah hian tute hian nge tihtur nei a, eng nge an tihtur tih te hi hriattur a tam hle nia a hriat thu a sawi a. Hotu leh hruaitu tha pawimawhzia chu Lal ropui Zakapa chanchinah a chiang hle nia a hriat thu a sawi bawk.

Hun kaihruaitu Social Welfare & Tribal Affair Director Dr. Lalhriatzuali Ralte chuan Mizo lal ropui leh huaisen chanchin leh nunah Mizo hmeichhiate zahawmna humhim a nih theih nan a lalna leh a nun pawh dah tha tih sawiin, “An tana Kumpinu Sawrkar a do kha a ropui a, thangthar ten a chanchin hi kan hriat a pawimawh hle a ni,” a ti a. Lal Zakapa nun, a chanchin leh hmeichhia te tana Kumpinu Sawrkar a do dang tlangpui chu Padma Shri Prof. RL Thanmawia chuan sawiin, Film siam dan leh chan dan tlangpui he Film siamtu TC. Vanlalzauva chuan a sawi bawk a ni. He Film hi thla 10 chhung atan Runmawi App-ah man chawia en thei turin dah a ni dawn a ni.