MZP in UG Result chhuaka tithate an chawimawi

Mizo Zirlai Pawl (MZP) General Hqrs. chuan Mizoram University in Under Graduate (UG) result tihchhuaha Arts, Science, Commerce leh Home Science Stream Gold Medalist te lawmpuina hun nizan hmasa khan an buatsaih.

Ignite Studio-a hemi puala hun hman hi Agriculture Minister PC. Vanlalruata chuan khuallian nia hmanpuiin Central Service a Mizote dinhmun thlirin a lungawi thlak loh hle tih sawiin, “Kan hnam tan pawh a lungngaihthlak zia leh zirna kan ngaihsan viau rualin a Top Level-ah duhthu kan sam lo hle,” a ti a. Nationalism-ah kan chian a tul thu sawiin, “State danga kan Tribal pui te Central Service-ah kan tluk lo hle a, thangthar zawkte kan tan a ngai takzet. Social Media-in thangtharte a luah hneh hle a, kan tlansan ngam a hei ai nasa zawka zirna lam kan luhchilh a ngai takzet,” a ti bawk.

He hunah hian Under Graduate (UG) Arts, Science, Commerce leh Home Science Stream Gold Medalist te chu Memento, MZP Sash, Pangpar leh pawisa fai Rs. 5000/- theuh hlan an ni a, Arts Stream-ah Lalhlimpuii, Economics Dept. (Pachhunga University College); Science Stream-ah Lalhriatzuala, Chemistry Dept. (Pachhunga University College); Commerce Stream-ah David R. Lalhumhima, (Pachhunga University College) leh Home Science Stream-ah Gracy Lalruatthari, (Govt. Zirtiri Residential Science College) te hnenah chawimawina hi hlan an ni.

Heng zirlaite chawimawina hunah hian MZP General Hqrs. Vice President C. Lalremruata chuan Sawrkarin Right to Education hnuaia School naupang lehkhabu a sem thin chu tunah hian zirlai tam takin la dawng lo nia sawiin, School 700 chuang lehkhabu la dawng kim lo awm chu a rang lama hma la turin thuneitute an ngen thu a sawi a, Mizoram Government Press, Printing and Stationery Department hnuaia zirlaibu la print kim lo chu inenfiah tura an duh thu a sawi bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man