Mizoram Chief Minister in Prime Minister leh Sawrkar laipui-a Minister te a dawr mek

New Delhi-a cham mek Chief Minister Lalduhoma chuan Inrinni khan Prime Minister Narendra Modi bakah Union Minister of Minority Affairs Kiren Rijiju te kawmin Mizoram thil pawimawh hrang hrang a sawipui a. Nimin khan Minister dang te pawh a kawm chhunzawm bawk.

Chief Minister hian Inrinni khan Prime Minister chenna In ah Narendra Modi hi kawmin Assam Rifles sawnchhuah chungchang te, Mizoram Sawrkar Handholding Policy chungchang leh Bangladesh atanga lo lut Zohnahthlak Bawm unaute chungchang te an sawi a. Chief Minister hian, Zohnahthlak Bawm unaute Bangladesh atanga himna zawnga Mizoram rawn lut te chu a thawnkir theihloh thu chiang takin Prime Minister hnenah hian a sawi niin sawrkar thuchhuah chuan a tarlang a. Prime Minister hi Mizo thar thei leh chawhmeh hrang hrang Sapthei (Passion Fruit), Dragon Fruit, Balhla leh Mautuai te a pe a. Prime Minister hian a lo ngaihlu hlawm hle a. Heng thei hrang hrangte hi kuthnathawktute dinhmun leh Mizoram economy tihhmasawnna tura pawimawh tak a nih theih thute Chief Minister hian Prime Minister hnenah hian a sawi bawk a ni.

Chief Minister hian Inrinni tlai khan Minister of Minority Affairs leh Parliamentary Affairs Kiren Rijiju pawh a chenna In ah hmuin an inkawm bawk a, Kiren Rijiju hian PMJVK hnuaia Mizoram in project 65 a neih zinga hmanhmawhthlak zual 29 chu tihhlawhtlinsak vat a lo tiam thu leh a bak project 36 pawh bawhzui vat a tum dawn tih a lo hrilh tih sawrkar thuchhuah chuan a tarlang a ni.

New Delhi-a cham mek Chief Minister hian nimin chawhma lam khan Union Minister of State for Fisheries, Animal Husbandry and Dairying George Kurian chu a chenna In-ah kawm bawkin African Swine Fever (ASF) hri leng vanga Mizoram in harsatna tawh mek leh tanpuina a mamawh dan te a sawipui a. Sangha khawi lama Mizoram tihhmasawn dan tura ruahmanna (project) a thehlut bawk.

Hemi hnu hian Defence Minister Rajnath Singh pawh Chief Minister hian a chenna In-ah hmu nghalin Mizo Scouts Battalion din chung-chang te, Assam Rifles sawnchhuah chungchang te, Lengpui Airport chungchang bakah Mizoram hmasawnna tur thil pawimawh dang te a sawipui leh a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man